مغموم نہ ہو حرف کو پابندِ ثنا کر ۔۔ مقصود علی شاہ

مغموم نہ ہو حرف کو پابندِ ثنا کر
سرکار نوازیں گے مدینے میں بُلا کر

اے قریۂ محبوب سے آئی ہُوئی خُوشبُو
آ، کوچۂ احساس میں، سانسوں میں رَہا کر

اے مالکِ کُل میری تمنا کا بھرم رکھ
لایا ہُوں دُعاؤں کو بھی نعتوں میں سجا کر

کچھ اور تقاضا نہیں اس جذبِ دروں کا
تُو دینے پہ قادر ہے مجھے خُود کو عطا کر

آتا ہے نظر میں پہ نظر آتا نہیں ہے
مَیں دیکھتا ہُوں خواب ترا دید بُجھا کر

مٹ جائے گی ہر کرب کے امکان کی صورت
چھَٹ جائیں گے غم، صلِ علیٰ صلِ علیٰ کر

گھَٹ جانے ہیں کب اُس درِ رحمت کے خزانے
تُو مانگ سدا مانگ، صداؤں پہ صدا کر

تسکین میں ڈھلتی نہیں تدبیر کی باتیں
اِس پیکرِ خاکی کو عطا خاکِ شفا کر

اے کاش کوئی عصرِ زیاں کار سے کہہ دے
تابانئ قسمت کو مدینے کو گیا کر

آتا ہے اُنہیں کاسۂ احساس کو بھرنا
بہتر ہے تُو خواہش کو پسِ حرف رکھا کر

مقصود مدینے کی عطاؤں کے تصدق
رکھتی ہے ثنا مجھ کو مدینے کا بنا کر
----
Maqsood Ali Shah
مقصود علی شاہ
​

 

اے مالکِ کُل میری تمنا کا بھرم رکھ
لایا ہُوں دُعاؤں کو بھی نعتوں میں سجا کر
​

 

مٹ جائے گی ہر کرب کے امکان کی صورت
چھَٹ جائیں گے غم، صلِ علیٰ صلِ علیٰ کر​

 

آتا ہے اُنہیں کاسۂ احساس کو بھرنا
بہتر ہے تُو خواہش کو پسِ حرف رکھا کر
​

 

مقصود مدینے کی عطاؤں کے تصدق
رکھتی ہے ثنا مجھ کو مدینے کا بنا کر​

 

سبحان اللہ - جزاک اللہ

 

اللہ تعالٰی آپ کو بھی جزائے خیر عطا کرے آمین