مشورہ کلینک

مشورہ کلینک

مجھے بچپن سے ہی کورس کی کتابوں سے الرجی رہی ہے، یہ الگ بات کہ امتحان کے دنوں میں خوب محنت کرنی اور ہر کلاس میں اچھے نمبروں سے پاس ہو جانا نصیب میں لکھا تھا۔ امتحانوں سے فارغ ہو کر پھر کورس کی کتابوں کے بیچوں بیچ چھپا کر عمران سیریز یا تاریخی ناول پڑھنا، ابا جی نے منع کرنا کہ "بس کرو بھئی! رات بہت ہو گئی" مگر وہ میں ہی کیا کہ بات مان جاؤں۔ سزا کے طور پہ اکثر کمرے کا بلب اتار لیا جاتا کہ "اب پڑھ کر دکھاؤ"۔ لیکن جناب ہم بھی مطالعے کے سچے مجنوں تھے، کئی چاندنی راتیں گواہ ہیں کہ میں نے چاند کی چاندنی سے بھی بلب کا کام لیا۔ اپنی انہی عادات کی وجہ سے میں علامہ خواہ مخواہ کی طرح "پڑھا لکھا" مشہور کر دیا گیا حالانکہ

من آنم کہ من دانم​

ویسے بھی کم پڑھے لکھے خاندان میں اگر کوئی گریجویشن کر لے تو علامہ کہلا سکتا ہے، اس کا مجھے خاصہ تجربہ ہے۔ اسی بدنامی کی وجہ سے کئی عزیز، رشتہ دار اور دوست بھی مشورہ مانگنے آ جاتے تھے اور میں بھی ایسا سخی کہ کبھی بھی، کسی کو خالی ہاتھ نہیں لوٹایا، اپنے پلے کچھ ہو نہ ہو مشورے کا ٹوکرا بھر کے دے دیتا تھا کہ "لو بھئی! صبح، دوپہر ،شام ڈاکٹر کی دوا کی طرح مشورے پھانکو"۔ اکثر چاہنے والے تو ایک ہی خوراک سے شفایاب ہو جاتے تھے، گو کہ میں اب پاکستان میں مقیم نہیں ہوں، گزشتہ سولہ برس سے برطانیہ میں رہائش پذیر ہوں، مگر یہ مشورہ کلینک اب بھی جاری ہے۔ میرے ایک دوست ملک زاہد جن کو میں اپنا "مستقل مریض" کہتا ہوں اکثر یہ جانے بغیر کہ پاکستان اور برطانیہ کے نظام الاوقات میں چار سے پانج گھنٹے کا فرق ہے، ہفتہ اتوار، چھٹی کے دن ہیں، یہ جناب صبح سویرے پانچ بجے فون کر دیتے ہیں کہ " یار! یہ مسئلہ ہے، کیا کیا جائے؟"۔ کتنی مرتبہ کہا کہ " ملکا! وقت دیکھ لیا کرو، کیوں چھٹی والے دن اہلِ محلہ کی نیند خراب کرتے ہو"۔ جواب آتا ہے کہ " نو بج چکے ہیں اب تو دن نکل آیا ہے"۔ کئی بار کہتا ہوں کہ " ملکا! میرے یہاں ابھی پانچ بجے ہیں اور سردیوں کے موسم میں یہ آدھی رات کے برابر ہوتا ہے"۔ مگر میرے اس مستقل مریض کا استقلال ہے کے ٹس سے مس نہیں ہوتا۔ ایک دفعہ کا ذکر ہے کہ جناب نے پوچھا کہ " یار کیا کروں، بھوک بہت لگتی ہے۔ کھانا کھانے کے بعد بھی احساس ہوتا ہے کہ ابھی کچھ کھایا ہی نہیں۔ سو وقفے وقفے سے کچھ نہ کچھ کھاتا ہی رہتا ہوں۔ یوں سمجھ لو کہ ہر گھنٹے بعد باورچی خانہ ہوتا ہے اور میں کچھ نہ کچھ تلاش کر رہا ہوتا ہوں"۔ آپ میرے اس دوست کی صحت دیکھیں تو کہیں کہ یہ کھانا کھاتا ہے یا کہ کھانا اِسے کھاتا جا رہا ہے۔ خیر جناب میں نے مشورہ داغ ہی دیا، مشورہ کونسا حکیم کا نسخہ تھا کہ بنوا کر بھجوانا تھا، میں نے کہا کہ " ملکا! تیری جو یہ بیماری ہے اسے طبی زبان میں "جوع البقر" کہتے ہیں یعنی بکری کی طرح ہر وقت منہ مارتے رہنا اور یہ اب تیری پکی عادت بن چکا ہے جسے اب روکا یا ختم نہیں کیا جا سکتا۔ ویسے بھی یہ تم ہو تو انسان مگر بیماری ڈنگروں والی لگ گئی ہے۔سو علاج بھی ڈنگروں والا کرنا پڑے گا"۔ ملک کہنے لگا " میں تیار ہوں، بس علاج بتاؤ"۔ میں نے کہا کہ" کھانے کے اوقات میں دوسروں کے ہاں جانے سے گریز کیا کرو، وہ ویسے بھی اب لوگ تم کو مہمان کم وبالِ جاں زیادہ سمجھتے ہیں۔ رہ گیا تمہارا اپنا گھر تو میں نے بھابھی کو فون کر کے کچن کو ڈبل تالا لگوا دیا ہے، لہٰذا اب تمہیں گھر سے صرف خیالی پلاؤ اور تازہ ہوا ملا کرے گی، ویسے بھی تم کو ڈنگروں والی بیماری ہے، ان انسانی خوراکوں سے تیرا کچھ نہیں بننا، اب ایسا کیا کرو جب بھی بھوک لگے صحن میں جاؤ اور تازہ گھاس سے لطف اندوز ہو اور اگر اس سے بھی کام نہ بنے تو چیونگم منہ میں ڈال کر جگالی کیا کرو، اللہ بھلی کرے گا"۔ ملک کہنے لگا "یار کہاں گھاس اور کہاں میں، انسان ہوں، گھاس کھاتے اچھا لگوں گا کیا، دنیا کیا کہے گی؟"۔ میں نے کہا " دنیا والوں کو تمہاری اس بیماری کا علم ہے، لوگوں نے زیادہ سے زیادہ تمہارا نام ملک بکری رکھ دینا ہے، ویسے بھی جدید تحقیق نے ثابت کیا ہے کہ گھاس کھانے سے انسان کی صحت پہلے سے بہتر ہو جاتی ہے"۔ دوستو! اس مشورے کے بعد مجھے کچھ کچھ "گمان" سا ہو چلا ہے کہ اس بار ملک سے چھٹکارہ ممکن ہے اور ہو سکتا ہے کہ اس کی بے وقت ٹیلی فون کالز سے مجھے نجات مل جائے۔ یقین سے اس لئے نہیں کہا کہ وہ ملک زاہد ہے اور میرا یہ مستقل مریض نما دوست، بڑا مستقل مزاج واقع ہوا ہے۔ میرا مشورہ کلینک بند نہیں ہونے دے گا، انشاءاللہ۔​

 

جواب: مشورہ کلینک

یہ مشورہ کلینک دوستوں کے لئے ہے، اور دوستوں سے فیس لینے کا میں قائل نہیں، جی ضرور جیسے وقت ملا اور دماغ کے تھیلے سے کچھ برآمد ہوا تو کچھ نہ کچھ لکھتا رہوں گا، پسندیدگی کے لئے شکریہ۔

مت گھبرائیں، آپ سے فیس نہیں لی جائے گی، آ جائیں۔ رہی بات میری، اپنا وہ حال ہے کہ؛
یہ مرض لاعلاج ہے، دوا کریں تو کیا کریں؟
کہ چارہ گر کے ہاتھ ہی، کریں تو معجزہ کریں

 

جواب: مشورہ کلینک

پسندیدگی کا شکریہ، جی کوشش کروں گا کہ لکھتا رہوں۔

 

جواب: مشورہ کلینک

بھت خوب زیرک جی :mashallah:

دل خوش ہوگیا

آپ کی طرف سے مزید تحاریر کا انتظار رہے گا
شکریہ
والسلام

 

جواب: مشورہ کلینک

پسندیدگی کا شکریہ، جناب آئندہ بھی کچھ نہ کچھ لکھنے کی کوشش کروں گا، انشاءاللہ۔

 

جواب: مشورہ کلینک

بہت خوبصورت تحریر تھی سپرسپر مزا آگیا زیرک جی اللہ تعالی آپ کےقلم کے زور کو اور بڑھاۓ

 

جواب: مشورہ کلینک

تحریر آپ کو پسند آئ، سمجھیں اپنی محنت وصول ہوگئی، انشاءاللہ آئندہ جب بھی لکھنے کا موڈ ہوا اور وقت میسر آیا تو آپ سب سے ضرور بانٹوں گا، دعاؤں میں یاد رکھئے گا۔ خوش رہیں آباد رہیں۔

فلمسٹار میرا کی طرح آپکو بھی تعریف کروانا پسند ہے۔ وہ بھی پچھلے 25 سال سے ماشاءاللہ 27 سال کی ہی ہے۔ آپکا پتا نہیں۔