مجھے اے ہم نشیں اس زندگی نے

مجھے اے ہم نشیں اس زندگی نے
ہنسایا جب تو رونے کو ہنسایا

ارے اس عالم تعجیل خو نے
یہاں مجھ کو بہت پہلے بلایا

جہاں سو سال بعد آنا تھا مجھ کو
وہاں سو سال پہلے کھینچ لایا

مجھے گونگوں کی محفل میں جگہ دی
مجھے سوتوں کے حجروں میں جگایا

مجھے بونوں کے پہلو میں جگہ دی
مجھے مردوں کی ارتھی پر بٹھایا

ہزاروں بار مجھ پر مفتیوں نے
بگڑ کر کفر کا فتویٰ لگایا

کمر میرے تجسس کی جھکا دی
گلا میرے تفکر کا دبایا

مرے افکار پر کی سنگ باری
اور اتنی کوئی پھل رہنے نہ پایا
​