غزل - جی کے شاید نہیں کبھی پائی

غزل

جی کے شاید نہیں کبھی پائی
مر کے ہم نے جو سرخوشی پائی

روبرو آئنے کے ہم آئے
عکس نے تب ہی زندگی پائی

قطرہ قطرہ بکھر گئی شبنم
اور پھولوں نے تازگی پائی

غم کو دل سے لگا لیا ہم نے
اِس طرح زیست کی خوشی پائی

روشنی تو تمام روشنی ہے
تیرگی میں بھی روشنی پائی

ہم نہیں ہیں تو سچ کہو جاناں
تم نے محفل میں کچھ کمی پائی

حسن کو ہوش سے رہی نسبت
عشق نے شانِ بے خودی پائی

دوستی کیا ہوئی سمندر سے
دل نے صحرا سی تشنگی پائی

زخم بوئے تھے کشتِ دل میں فصیحؔ
فصل بھی ہم نے درد کی پائی

شاہین فصیح ربانی

 

جواب: غزل - جی کے شاید نہیں کبھی پائی

ملک بلال جی!
اس عنایت کے لیے تہِ دل سے شکرگزار ہوں۔
بہت خوش رہیے۔