غریب تر ہوں میں لیکن نوازا جاتا ہوں ۔۔ عباس عدیمؔ قریشی

صلی اللہ علیہ وآلہ وسلم
غریب تر ہوں میں لیکن نوازا جاتا ہوں
درِ نبی کو ہمیشہ قریب پاتا ہوں

مری تو سوچ کا محور حضور رہتے ہیں
انہی کو لکھتا ہوں جب بھی قلم اٹھاتا ہوں

ضیاء درودوں کی مجھ سے چھلکتی رہتی ہے
درود پڑھتا ہی رہتا ہوں جگمگاتا ہوں

یہ روسیاہیء اعمال چھٹتی جاتی ہے
انہی کو سوچتا جاتا ، نکھرتا جاتا ہوں

ہے مصطفیٰ کی کریمی سے آشنائی مری
پکارتا ہوں انہی کو جو ڈگمگاتا ہوں

کرم نے مجھ پہ مری دسترس نہ رہنے دی
سمٹنا چاہوں میں لیکن بکھرتا جاتا ہوں

مجھے ادب کا قرینہ تو کچھ سکھا اے فراق
کہ کچھ دنوں سے حضوری سی دل میں پاتا ہوں

مرے ہنر پہ مجھے رزق کون دیتا ہے
حضور آپ کی نسبت کا صدقہ کھاتا ہوں

مرے تو پاس یہی اشک اک اثاثہ ہیں
حضور آپ کی راہوں میں جو لٹاتا ہوں

مری خطاؤں نے رونا ہی مجھ کو بخشا ہے
حضور آپ کو لکھتا ہوں مسکراتا ہوں

مری دعا کا قرینہ عجیب تر ہے عدیمؔ
سلام پڑھ کے میں ان سے دعا کراتا ہوں
-------
عباس عدیمؔ قریشی
مجموعہ نعت ﷺ ۔ " اغثنی "
عباس عدیمؔ قریشی​

 

اللہ تعالیٰ آپ کوبھی جزائے خیر عطا کرے آ مین

 

مرے ہنر پہ مجھے رزق کون دیتا ہے
حضور آپﷺ کی نسبت کا صدقہ کھاتا ہوں​

 

مرے تو پاس یہی اشک اک اثاثہ ہیں
حضور آپﷺ کی راہوں میں جو لٹاتا ہوں​

 

مری خطاؤں نے رونا ہی مجھ کو بخشا ہے
حضور آپﷺ کو لکھتا ہوں مسکراتا ہوں​

 

سبحان اللہ - جزاک اللہ

 

اللہ تعالیٰ آپ کو بھی جزائے خیر عطا کرے آمین

 

اللہ تعالیٰ آپ کو بھی جزائے خیر عطا کرےآمین