عجب عالم ہے اُس کا، وضع سادی، شکل بھولی ہے - امیر مینائی

غزل
(امیر مینائی رحمتہ اللہ علیہ)

عجب عالم ہے اُس کا، وضع سادی، شکل بھولی ہے
کبھی جاتی ہے دل میں، کیا رسیلی نرم بولی ہے

ادائیں کھیلتی ہیں رنگ، تلوار اُس نے کھولی ہے
لہو کی چلتی ہیں پچکاریاں، مقتل میں ہولی ہے

بہار آئی، چمن ہوتا ہے مالا مال دولت سے
نکالا چاہتے ہیں زرگرہ غنچوں نے کھولی ہے

عجب ملبوس ہے ہم وحشیوں کا رختِ عریانی
گریباں ہے، نہ پردہ ہے، نہ دامن ہے، نہ چولی ہے

صراحی دور میں آتی ہے، زاہد ہوں جو محفل میں
جُھکالیں اپنی آنکھیں، دخترِ رز کی یہ ڈولی ہے

امیر ، اس بیوفا دنیا کی صورت پر نہ تم جاؤ
بڑی عیّار، مکّار ہے، ظاہر میں بھولی ہے
​

 

جواب: عجب عالم ہے اُس کا، وضع سادی، شکل بھولی ہے - امیر مینائی

واہ ۔ بہت خوب کاشفی بھائی ۔