طرحی غزل

طرحی غزل
(ہم تجھ سے اے نسیم سحر بولتے نہیں)​

جلتے ہیں تیز دھوپ میں، پر بولتے نہیں
گلشن میں چپ کھڑے ہیں شجر بولتے نہیں​

صحرا کو دے رہیں ہیں گلستان کا روپ ہم
یہ کام گو اہم ہے، مگر بولتے نہیں​

رہتا ہے تیرا ہجر کی راتوں میں انتظار
"ہم تجھ سے اے نسیم سحر بولتے نہیں"​

آسان منزلیں بھی ہوئیں ہیں بہت کٹھن
مجھ سے میرے شریک سفر بولتے نہیں​

جھونکے ہوا کے بھر گئے ہیں نفرت سے کیا یہاں
کیا وجہ کیوں بشر سے بشر بولتے نہیں​

مسند جو مل گئی ہے تو اترا رہے ہیں وہ
ورنہ خلاف شان دگر بولتے نہیں​

وہ دیکھ تو رہے ہیں بہت دور تک مگر
خاموش ہیں سب اہل نظر بولتے نہیں​

برسوں سے ہم نوالہ بھی ہیں ہم پیالہ بھی
لیکن بجز زبان شرر بولتے نہیں​

کرتا ہے ان سے رات میں پہروں وہ گفتگو
غوری سے کیوں نجوم و قمر بولتے نہیں​

عبدالقیوم خان غوری – الجبیل الصناعیہ، سعودی عرب​