سلسلہ نعت کا جب روح میں جاری ہو جائے ۔۔مقصود علی شاہ

سلسلہ نعت کا جب روح میں جاری ہو جائے
سانس در سانس رواں بادِ بہاری ہو جائے

از سرِ نَو ہی لکھا جائے مجھے بَردہ نسب
زیست پہلے بھی تمھاری ہے، تمھاری ہو جائے

کافی ہے بہرِ عنایات و شفاعت یکسر
نعتِ مقبول اگر کار گزاری ہو جائے

سبز ہاتھوں میں چمکتا ہُوا وہ سبز درود
میرے میزان میں چمکے تو وہ بھاری ہو جائے

ایک امکان سا آنکھوں میں رہے خواب طلب
پھر یہ احساس بھی احساس پہ طاری ہو جائے

مَیں بھی اِک مصرعۂ مدحت کی لگوں کاوشِ کُل
مصحفِ زیست کی گر حرف شُماری ہو جائے

خامشی جیسے کہ ہے نعت کی تصویرِ نیاز
نطق بھی غیر کی تعبیر سے عاری ہو جائے

موت بھی آئے اِسی کیفِ مسلسل میں کہیں
زیست جو مدح سرا، ساری کی ساری ہو جائے

درگہِ ناز میں مقصود نہیں حاجتِ حرف
سو کسی اور طرح عرض گزاری ہو جائے
------
مقصود علی شاہ
Maqsood Ali Shah

​

 

ماشاء اللہ ،سبحان اللہ!

 

جزاک اللہ

 

سبحان اللہ جزاک اللہ