سبحان تیری شان عیاں برگ وثمر میں-خالق تیری صناعی ہےہرشجر وحجر میں۔ حمدیہ کلام

بارگاہِ الہیہ میں تازہ حمدیہ کلام
سبحان تیری شان عیاں برگ و ثمر میں
خالق ! تیری صناعی ہے ہر شجر وحجر میں
-
آفاق تیری عظمتِ ہستی کے ہیں شاہد
ڈنکا تیری قدرت کا بجے شمس وقمرمیں
-
تو ربِّ جہاں ، مالکِ ہر ارض و سما ہے
پالے تو ہر اک جان کو برمیں یا بحر میں
-
تحقیق و مباحث کے دفاتر کو کھنگالا
تیرا ہی پتہ ملتا ہے ہر لفظ وسطر میں
-
وسعت تیری رحمت کی زمانے میں سمائی
تو شفقتِ مادر میں ، تو ہی کرمِ پِدر میں
-
ظاہر ہی نہیں ، دنیائے باطن میں بھی تو ہے
تو روح میں، تو قلب میں تو دیدہء تر میں
-
مافوق ہے تو عقلِ بشر سے میرے مولا !
چاہے تو سماجائے فقط قلبِ بشر میں
-
لوَلَاکَ سے تخلیق کا عُقدہ ہوا افشا
پنہاں تھی فقط شانِ نبی، کُن کے امر میں
-
ڈھونڈے جو تجھے اپنے تئیں ڈھونڈ نہ پائے
پائے جو تلاشے تجھے محبوب کے گھر میں
-
ہم طالبِ رحمت ہیں، گنہ گار ہیں مولا !
بخشش تیری مل جائے یہاں اور حشر میں
-
صدقہء نبی، حق کو عطا کر وہی نصرت
جو تو نے اتاری تھی ، اُحد اور بدر میں
-
ایمان رضا ہے وہ رگِ جاں سے بھی اقرب
ہے دردِ ہجر کیسا یہ پھر قلب و جگر میں ؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کلام : محمد نعیم رضا قادری۔ اتوار 26جون2016۔ ویانا

 

پسندیدگی اور حوصلہ افزائی کا بہت شکریہ ۔ آمین ۔ جزاک اللہ خیر

 

بہت شکریہ پیارے بھائی