دیدۂ شوق کو اِک حسرتِ شب ہے آقاﷺ ۔۔ مقصود علی شاہ

دیدۂ شوق کو اِک حسرتِ شب ہے آقاﷺ
شب کہ جس شب کو میسر تری چھب ہے آقاﷺ

زیست تھی قریۂ معدوم کا بے نام سکوت
تیرا ہُونا مرے ہُونے کا سبب ہے آقاﷺ

نطق اس کارگۂ شوق میں تھا نعت طلب
اذن ملتے ہی بنا نازشِ لب ہے، آقاﷺ

حاضری ہاتھ پہ رکھ دیتی ہے بخشش کے نصاب
رنگ یہ تیری شفاعت کا عجب ہے آقاﷺ

آنکھ پھر کیوں نہ کرے منظرِ دیگر سے گریز
دیکھنے کو جو ترا خوابِ طرب ہے آقاﷺ

من کے ادبار سے بوجھل ہُوا جب قصۂ جاں
نازشِ خَلق ہُوا تیرا نسب ہے آقاﷺ

روبرو آپ کے دَم بستہ عطائیں حاضر
سامنے آپ کے شرمندہ طلب ہے، آقاﷺ

شوکتِ ہر دو سرا اسمِ کرم کی طلعت
شافعِ روزِ جزا تیرا لقب ہے، آقاﷺ

صوت میں ڈھلتے نہیں خواہشِ اظہار کے ساتھ
میرے حرفوں کو بہت پاسِ ادب ہے، آقاﷺ

مَیں، مرے بچے، مری جان، مرے عزّ و شرف
میرا تو کچھ بھی نہیں، تیرا ہی سب ہے آقاﷺ

پھر کوئی حرفِ عطا صدقۂ حسّانِ عجم
تیرا مقصود بھی تو کاسہ بہ لب ہے آقاﷺ
-----
Maqsood Ali Shah
مقصود علی شاہ



​

 

زیست تھی قریۂ معدوم کا بے نام سکوت
تیرا ہُونا مرے ہُونے کا سبب ہے آقاﷺ
​

 

حاضری ہاتھ پہ رکھ دیتی ہے بخشش کے نصاب
رنگ یہ تیری شفاعت کا عجب ہے آقاﷺ​

 

روبروآپ کے دَم بستہ عطائیں حاضر
سامنے آپ کے شرمندہ طلب ہے، آقاﷺ

​

 

مَیں، مرے بچے، مری جان، مرے عزّ و شرف
میرا تو کچھ بھی نہیں، تیرا ہی سب ہے آقاﷺ
​

 

پھر کوئی حرفِ عطا صدقۂ حسّانِ عجم
تیرا مقصود بھی تو کاسہ بہ لب ہے آقاﷺ​

 

سبحان اللہ - جزاک اللہ

 

اللہ تعالٰی آپ کو بھی جزائے خیر عطا کرے آمین