دھرتی نوں اسمان بناوے عشق دی ایہہ تاثیر ، واصف علی واصف

دھرتی نوں اسمان بناوے عشق دی ایہہ تاثیر
عاشق کہن امام رانجھے نوں ، ہیر اے معشوقاں دی پیر

ایہہ جیون اک سُندر سُفنہ ، ادھے راہ چ مُک جاندا اے
عمر بچاری رو رو لبھدی خواباں دی تعبیر

میں ہساں تے دھرتی ہسے ، روواں تے رووے اسمان
میں ہاں قادر ، قدرت میری ، میں اپنی تقدیر

عشق ہے اپنا آپے کعبہ ، عشق قرآن حدیث
عشق "انا اللہ" ، اللہ اللہ ! کون عشق دا پیر

عشق فرید تھلاں دا راہی رو رو عمر گزراے
عشق ہری اے ہرہر اندر ، عشق اے بھگت کبیر

تیرے میرے رشتے کُوڑے ، کُوڑا سب پسار
"ماپے" ، "چاچے" ، "مامے" ، کاہدے ، عشق دے کیہڑے ویر

عشق "الست" ، "بلٰی" دا قصہ ، عشق نفی اثبات
کثرت دی وچ عشق دی وحدت ، وحدت وچ تکثیر

عشق مزمل ، عشق مدثر ، طہٰ تے یسین
ظاہر باطن ذات عشق دی ایہو مُڈھ اخیر

عشق شہید شہادت حق دی ۔ عشق رضا دا بندہ
عشق اویس ، ابوذر جامی ، عشق علی شبیر

عشق دا ڈیرہ سولی اُپر ، عشق تے موت حرام
وصل فراق تُوں عشق اگیرے ، عشق سمیع بصیر

مر کے جیندا ، جی کے مَردا ، عشق بڑا کجھ کردا
"موتو قبل" ، "بل احیاھم" عشق دی ذات قدیر

عقلاں نال عشق نہ ہُندا ، عشق دی اُلٹی چال
عشق ہووے تے وگدے واصف اکھاں دے وچ نیر

 

بہت خوب بوبی جی :a180:

 

انشاءاللہ ہارون بھائی اگر آپ کے پاس کوئی سید واصف علی واصف کی نعت ہے تو آپ بسمہ اللہ کریں

 

عدنان بھائی ۔ اک اک شعر پڑھ کے روح تے وجد طاری ہوجاندا اے۔
ماشاءاللہ تسی بوہت ودھیا کلام ایتھے ارسال کیتا اے۔
تہاڈی بڑی مہربانی ۔ جزاک اللہ ۔