دل میں اگر بسی ہے محبت رسول کی ۔شفیق رائے پوری

دل میں اگر بسی ہے محبت رسول کی
پھر ہم کو ڈھونڈ لے گی شفاعت رسول کی

ثانی نہیں ہے کوئی کہیں بھی رسول کا
ظاہر اسی سے ہوگئی عظمت رسول کی

دیکھا جو مصطفے کو تو جبریل بول اٹھے
سب صورتوں میں خوب ہے صورت رسول کی

پوشیدہ ہر ادا میں ہیں اسلام کے رموز
دیکھواٹھا کےخلوت وجلوت رسول کی

قائل نہیں ہیں مدحت اہل دول کے ہم
مثل رضا عزیز ہے مدحت رسول کی

جنت ہماری کیوں نہ ہو سیدھی سی بات ہے
ہم لوگ ہیں رسول کے جنت رسول کی
(ثانی مصرع: استفادہ)

چہرے پہ جیسے نور برسنے لگا شفیق
جب سے سجی ہے چہرے پہ سنت رسول کی

شفیق رائے پوری
​

 

اللہ تعالیٰ آپ کو بھی جزائے خیر عطا کرے آمین