دعائے سیدِ ابرار ہیں عمر فاروق ۔۔ سعادت علی ثاقب

دعائے سیدِ ابرار ہیں عمر فاروق
گلِ بہشت کی مہکار ہیں عمر فاروق

وہ جن کے سائے سے شیطان بھاگ جاتا ہے
خدائے پاک کی تلوار ہیں عمر فاروق

رسولِ پاک نگارندۂ قلوب و نگاہ
انہی کے فیض کا شہکار ہیں عمر فاروق

جو میرے بعد نبی ہوتے تو عمر ہوتے
حدیثِ حق کے سزاوار ہیں عمر فاروق

زمیں کے ساتھ دلوں کو بھی فتح کرتے ہیں
وہ جن کے قافلہ سالار ہیں عمر فاروق

کوئی بھی جرم کرے ان سے بچ نہیں سکتا
نظامِ عدل کا معیار ہیں عمر فاروق

وہ جس کو پیاری ہے ثاقب رسولِ پاک کی ذات
اسی کے دلبر و دلدار ہیں عمر فاروق
-------
سعادت علی ثاقب ​