دریا تو موجود ہیں پانی غائب ہے

دریا تو موجود ہیں پانی غائب ہے
منظر سے تصویر پرانی غائب ہے
چوری چھپے ہی چھوڑ کے باغ بغیچے کو
آدھی رات میں رات کی رانی غائب ہے
دروازے پر دستک پھر تبدیلی کی
کرداروں کے ساتھ کہانی غائب ہے
استفسار کیا حیرت نے شیشے سے
مشکل سے آخر کیوں حیرانی غائب ہے
بچپن اور بُڑھاپا دونوں حاضر ہیں
جھلک دکھا کر صرف جوانی غائب ہے
لگے ہوئے ہیں رزق ذخیرہ کرنے میں
لیکن اپنا دانہ پانی غائب ہے
پھینک رہا ہوں پتھر ٹھہرے پانی میں
رگ رگ سے مسعوؔد روانی غائب ہے
٭......٭......٭
مسعود احمد​