حضرتِ فاروقِ اعظم کی خلافت کو سلام ۔۔ خورشید بیگ میلسوی

حضرتِ فاروقِ اعظم کی خلافت کو سلام
ان کی جرات کو عزیمت کو عدالت کو سلام

لرزہ بر اندام جس کے نام سے کفار تھے
اس جری اس مردِ میدانِ شجاعت کو سلام

موجزن دل میں رہا جس کے سدا عشقِ رسول
ہاں اسی پروانۂ شمعِ رسالت کو سلام

تیری رائے پر کیا سب نے سرِ تسلیم خم
صاحبِ فہم و ذکا تیری بصیرت کو سلام

حضرتِ فاروق کی الفت ہے جس دل میں نہاں
اس کے ہر اک جذبۂ حسنِ عقیدت کو سلام

آبِ زر سے صفحۂ تاریخ پر جو ہے رقم
آپ کے اس ضوفشاں دورِ خلافت کو سلام

جس کی تجویزوں کو تائیدِ خداوندی ملی
اس مفکر صاحبِ فہم و فراست کو سلام

مصلحت اندیشیاں جس کو نہ قائل کر سکیں
جراتِ ایماں کو اس کی استقامت کو سلام

غیر ممکن تھا جہاں حکمِ شریعت سے فرار
آپ کی اس منفرد طرزِ حکومت کو سلام

شفقتِ پدری پہ دی جس نے فضیلت دین کو
اس کی شانِ عدل و انصاف و امارت کو سلام

ناز ہے خورشید جس پر ملتِ اسلام کو
اس امارت کو سیادت کو قیادت کو سلام
----
خورشید بیگ میلسوی ​