حئ علی خیر الاعمل

حئ علی خیرِ الاعمل

آنکھیں بچھا پیروں تلے
جن پر میرے آقا چلے
چل توبھی ان راہوں پہ چل
حئ علی خیر الاعمل

اپنی طرف تکتا نہیں
تجھ سا کوئی یکتا نہیں
جھونکا کسی طوفان کا
تجھ کو بجھا سکتا نہیں
کر بیعت عشق و وفا
بن جا چراغ مصطفیٰ :saw:
سینے میں جل ، ہاتھوں پہ جل
حئ علی خیر الاعمل

جب فرض تجھ کو یاد ہے
پھر تجھ پہ کیوں افتاد ہے
شاگردئ دنیا نہ کر
تو وقت کا استاد ہے
دل سرورِ دیں سے لگا
آنکھیں نہیں قسمت جگا
چہرہ نہیں شیشہ بدل
حئ علی خیر الاعمل

سارے صنم مسمار کر
خیر البشر :saw: سے پیار کر
رکھ کر نبی :saw: کو سامنے
آرائشءِ کردار کر
اپنائے گی رحمت تجھے
مل جائے گی جنت تجھے
اپنے عذابوں سے نکل
حئ علی خیر الاعمل

کیوں سرد ہے تیرا لہو
مایوس کیوں اتنا ہے تو
قرآن کی آواز میں
سن نغمہءِ لا تقنطو
تجھ میں تو اس کی باس ہے
جس جانِ حق کے پاس ہے
تیری ہر اک مشکل کا حل
حئ علی خیر الاعمل

سینے میں وہ شمعیں ڈھلیں
جو قبر کے اندر جلیں
ِسِکے وہ اپنے پاس رکھ
جو آخرت میں بھی چلیں
اندر سے بھی ہو جا ہرا
کھلنے سے پہلے مسکرا
گرنے سے پہلے ہی سنبھل
حئ علی خیر الاعمل


آنکھیں بچھا پیروں تلے
جن پر میرے آقا چلے
چل توبھی ان راہوں پہ چل
حئ علی خیر الاعمل

(مظفر وارثی)