جو کچھ کہنے کا اردہ ہو ضرور کہیے

جو کچھ کہنے کا اردہ ہو ضرور کہیے۔۔دورانِ گفتگو خاموش رہنے کی صرف ایک وجہ ہونی چاہیے۔۔وہ یہ کہ آپ کے پاس کہنے کے لیے کچھ نہیں ہے۔۔۔ ورنہ جتنی دیر چاہے ، باتیں کیجئے۔۔۔ اگر کسی اور نے بولنا شروع کر دیا تو موقع ہاتھ سے نکل جائے گا اور کوئی دوسرا آپ کو بور کرنے لگے گا۔۔۔ چنانچہ جب بولتے بولتے سانس لینے کے لیے رُکیں تو ہاتھ کے اشارے سے واضح کردیں کہ ابھی بات ختم نہیں ہوئی یا قطع کلامی معاف کہہ کر پھر سے شروع کردیجئے۔۔اگر کوئی دوسرا اپنی طویل گُفتگو ختم نہیں کر رہا تو بے شک جمائیاں لیجئے، کھانسیئے، بار بار گھڑی دیکھیئے۔۔۔ ابھی آیا ۔۔۔ کہہ کر باہر چلے جائیں یا پھر وہیں سو جایئے۔
یہ بالکل غلط ہے کہ آپ لگاتار بول کر بحث نہیں جیت سکتے۔۔اگر آپ ہار گئے تو مُخالف کو آپ کی ذہانت پر شبہ ہو جائے گا۔۔البتہ لڑیئے مت، کیونکہ اس سے بحث میں خلل آسکتا ہے۔۔۔ کوئی غلطی سرزد ہوجائے تو اسے بھی مت مانیے۔۔لوگ ٹوکیں، تو اُلٹے سیدھے دلائل بلند آواز میں پیش کرکے اُنہیں خاموش کرادیجئے،ورنہ خوامخواہ سر پر چڑھ جائیں گے۔۔۔ دورانِ گفتگو لفظ ’’آپ‘‘ کا استعمال دو یا تین مرتبہ سے زیادہ نہیں ہونا چاہیے۔۔اصل چیز ’’میں‘‘ ہے ۔۔۔ اگر آپ نے اپنے متعلق کچھ نہ کہا تو دوسرے اپنے متعلق کہنے لگیں گے۔۔۔ تعریفی جملوں کے استعمال سے پرہیز کریں۔۔۔ کبھی کسی کی تعریف مت کریں۔۔ورنہ سننے والے کو شبہ ہو جائے گا کہ آپ کو اُس سے کوئی کام ہے۔۔۔ اگر کسی شخص سے کچھ پوچھنا ہو تو، جسے وہ چُھپا رہا ہو،تو بار بار اُس کی بات کاٹ کر اُسے چڑایئے۔۔۔ وکیل بھی اسی طرح مقدّمے جیتتے ہیں ۔۔۔

(شفیق الرحمٰن کی کتاب ’’مزید حماقتیں‘‘ سے اقتباس)

 

بڑے عجیب اصول بیان کیے آپ نے بھائی۔۔۔۔ویسے یہ طنزومزاح سے بھرپور ہے۔۔شکریہ

 

یہ اقتباس دنیا دار اور بے حس لوگوں کے لئے تو یقینا ایک خزانے سے کم نہیں ہیں مگر کیا کیجئے ان لوگوں کا جن کی گھٹی میں یہ بٹھا دیا گیا ہے کہ ادب سے پیش آو۔ سامنے والے کی بات سنو، درمیان میں مت کاٹو وغیرہ وغیرہ۔

ہم بچپن سے اسی تعلیم کو سینے سے لگائے ہوئے ہیں اور بہت سے لوگوں نے عین ان اصولوں پر چلتے ہوئے ہمیں دبانے کی کوشش کی اور اپنی دھونس جمانے کا رعب جمایا مگر ہم نے ہمیشہ اخلاقی اقدار کو سامنے رکھا اور سنت نبوی کو نظروں میں رکھتے ہوئے ہر بات پہ سر خم تسلیم کیا مگر اب نجانے کیوں یہ برداشت نہیں ہوتا۔۔۔۔ کبھی کبھی ہم سامنے والے کو آئینہ بھی دکھا دیتے ہیں اور انھیں کہتے ہیں بس بھائی ہاتھ ہلکا رکھیئے۔۔۔

 

یہ میں نے نہیں شفیق الرحمن صاحب نے بیان کئے ہیں ۔۔۔۔۔۔

 

آپ کی کیا بات ہے جناب ۔۔۔ آپ یقیناً بہت اعلیٰ اوصاف کے مالک ہیں

 

سب ماں باپ کی تربیت ہے اور اللہ تعالی کا کرم ہے۔