جب یہ عالم ہو تو لکھیے لب و رخسار پہ خاک

جب یہ عالم ہو تو لکھیے لب و رُخسار پہ خاک
اُڑتی ہے خانۂ دل کے در و دیوار پہ خاک
تُو نے مٹّی سے الجھنے کا نتیجہ دیکھا
ڈال دی میرے بدن نے تِری تلوار پہ خاک
ہم نے مدّت سے اُلٹ رکھا ہے کاسہ اپنا
دستِ زردار! ترے درہم و دینار پہ خاک
پُتلیاں گرمیٔ نظّارہ سے جل جاتی ہیں
آنکھ کی خیر میاں رونقِ بازار پہ خاک
جو کسی اور نے لکھا ہے اسے کیا معلوم
لوحِ تقدیر بجا، چہرۂ اخبار پہ خاک
پائے وحشت نے عجب نقش بنائے تھے یہاں
اے ہوائے سرِ صحرا! تِری رفتار پہ خاک
یہ بھی دیکھو کہ کہاں کون بلاتا ہے تمھیں
محضرِ شوق پڑھو، محضرِ سرکار پہ خاک
آپ کیا نقدِ دو عالم سے خریدیں گے اِسے
یہ تو دیوانے کا سر ہے، سرِ پندار پہ خاک
یہ غزل لکھ کے حریفوں پہ اُڑا دی میں نے
جم رہی تھی مِرے آئینۂ اشعار پہ خاک

عرفانؔ صدیقی​

 

جواب: جب یہ عالم ہو تو لکھیے لب و رخسار پہ خاک

جناب آپکا بہت شکریہ، خوش رہیں۔

 

جواب: جب یہ عالم ہو تو لکھیے لب و رخسار پہ خاک

زبردست ۔