تین سوالوں کا ایک جواب

تین سوالوں کا ایک جواب
(سید تیمور الحسن)

سنو اک روایت میرے دوستو
ہے سچی حکایت میرے دوستو

ملا کافر اک عالم دین سے
عزائم لیے اپنے سنگین سے

کہا: مجھ کو مذہب سے انکار ہے
تجھے اس پہ کیوں اتنا اصرار ہے

سوالات کچھ تم سے پوچھوں گا میں
جواب آئے، پھر رب کو پوجوں گا میں

کہاں بس رہا ہے تمہارا خدا
نہ اس کی جھلک ہے نہ اس کا پتا؟

شیاطین جن آگ سے گر بنے
جلیں گے وہ دوزخ میں کس چیز سے؟

اگر فرد عاجز ہے، لاچار ہے
تو کیوں قتل انساں پہ مختار ہے؟

سنے عالم دین نے جب سوال
تو پیدا ہوا اس کے دل میں ملال

جو رنجیدہ ہو کر پکارا اسے
تو مٹی کے ڈھیلے سے مارا اسے

جو تکلیف کا دور جاری ہوا
تو ملحد پہ غصہ بھی طاری ہوا

کہا: میں عدالت میں اب جاؤں گا
سزا دیکھنا تجھ کو دلواؤں گا

وہ قاضی کے دربار میں آ گیا
سنایا عدالت میں سب ماجرا

کہا: عدل کا میں طلب گار ہوں
اور اسلام سے سخت بے زار ہوں

یہ سچا نہیں اس کے دل میں ہے کھوٹ
لگائی ہے اس نے میرے سر پہ چوٹ

یہ الزام سن کر معلم اٹھا
بڑے شوق و جذبے سے اس نے کہا:

کہاں زخم سر پہ ہے تیرے لگا
اگر ہے کہیں سب کو دکھلا ذرا!

نظر تیری تکلیف آتی نہیں
اگرچہ ہے تجھ کو مکمل یقیں

ہواؤں کو محسوس کرتا ہے تو
اگرچہ نہیں دیکھتا ان کو تو

اگر دل کی آنکھوں کو روشن کرے
خدا کی خدائی کا تو دم بھرے

تو مٹی تھا مٹی سے گھائل ہوا
خود اپنے سوالوں سے قائل ہوا

اگر خاک سے زخم آئے تجھے
تو جنات کیوں نہ جلیں آگ سے

اگر قادر انساں ہے انسان پر
تو روکے ذرا نظم شمس و قمر

خدا کی رضا سے یہ مختار ہے
خدا کی یہ قدرت کا شاہکار ہے

دلائل جب اس نے مکمل کیے
تو ملحد کا سر جھک گیا شرم سے​

 

بہت خوب کاشفی بھائی

 

جزاک اللہ

 

کاشفی بھائی ۔ واقعہ تو پہلے بھی سنا تھا

لیکن نظم کی شکل میں‌پڑھ کر اسکا مزہ دوبالا ہو گیا۔

بہت خوب

 

السلام علیکم ورحمتہ اللہ وبرکاتہ
امید ہے کہ سب خیریت سے ہونگے

میں نعیم بھائی کی بات سے متفق ہوں

خوش رہیں

 

وعلیکم السلام ورحمتہ اللہ وبرکاتہ
تمام دوستوں‌کا بہت بہت شکریہ
جزاک اللہ ۔۔۔ سب اپنا خیال رکھیں۔۔۔