بیت بازی - حصہ دوم

میں سو رہا تھا کسی یاد کے شبستاں میں
جگا کے چھوڑ گئے قافلے سحر کے مجھے

 

یہ عذر امتحانِ جذب دل کیسا نکل آیا
میں الزام اس کو دیتا تھا قصور اپنا نکل آیا

 

اس کی آنکھوں سے مجھے ہوتا ہے کیا کیا معلوم
کون کرتا ہے یہ جذبوں کے تراجم مجھ میں

 

نہ ہوگا یک بیاباں ماندگی سے ذوق کم میرا
حبابِ موجہ رفتار ہے نقشِ قدم میرا

 

اس نے کہا ہے صبر پڑے گا رقیب کا
لے اور بے قرار ہو اے بے قرار دل

 

سبب ہر ایک مجھ سے پوچھتا ہے میرے رونے کا
الہی ساری دنیا کو میں کیسے رازداں کر لوں

 

یہ چراغِ انجمن تو ہیں بس ایک شب کے مہماں
تُو جلا وہ شمع اے دل! جو بجھے کبھی نہ جل کے

 

یہ کیا کہ ایک طور سے گذرے تمام عمر
جی چاہتا ہے اب کوئی ترے سوا بھی ہو

 

مُند گئیں کھولتے ہی کھولتے آنکھیں ہَے ہَے!
خُوب وقت آئے تم اِس عاشقِ بیمار کے پاس

 

سورج سے گری تھی اک کرن سرخ
ہے آج تلک زمیں کا تن سرخ

 

خوب ہے عشق کا یہ پہلو بھی
میں بھی برباد ہوگیا، تُو بھی

جون ایلیا

 

یاروں میں نہ پایا جب کوئی عیب و گناہ
کافر کہا واعظ نے انہیں اور گمراہ
جھوٹے کو نہیں ملتی شہادت جس وقت
لاتا ہے خدا کو اپنے دعوے پہ گواہ
الطاف حسین حالی

 

رو پڑا ہوں تو کوئی بات ہی ایسی ہوگی
میں کہ واقف تھا تیرے ہجر کے آداب سے بھی

 

یہ ترا جمالِ کاکُل یہ شباب کا زمانہ
دل دشمناں سلامت دلِ دوستاں نشانہ

 

ہوں اگر ذوقِ کسب سے آگاہ
کریں میراث سے حذر وارث

 

نگاہِ دل کو جو رنگِ ثبات سے بھر دے
ابھی وہ پھول کسی شاخ پر کھلا ہی نہیں

 

راہ گزر دل کی نہ پل بھر کو بھی سنسان ہوئی
قافلے غم کے گزرتے رہے اکثر کیا کیا

 

مانگیں نہ ہم بہشت، نہ ہو واں اگر شراب
دوزخ میں ڈال دیجئے، دیجئے مگر شراب
میر مہدی مجروح

 

اے دل اب اُسکی یاد میں، کب تک یہ بیخودی
ہو اُس کی بزمِ ناز میں حاضر کِسی طرح

 

نکلے تھے جانے کیسی گھڑی گلستاں سے ہم
ایسے چھٹے کہ پھر نہ ملے آشیاں سے ہم