ایبٹ آباد میں سی آئی اے کا سیف ہاؤس

امریکی خفیہ ذرائع کا کہنا ہے کہ اسامہ بن لادن کے خلاف آپریشن ایبٹ آباد میں سی آئی اے کے ایک خفیہ ٹھکانے سے کئی ماہ تک کی جانے والی نگرانی کے بعد کیا گیا۔

امریکی حکام نے نام ظاہر نہ کرنے کی شرط پر اخبار واشنگٹن پوسٹ کو بتایا ہے کہ اس خفیہ ٹھکانے پر جاسوسوں کی ایک چھوٹی ٹیم موجود تھی جس نے کئی ماہ تک اس کمپاؤنڈ کی نگرانی کا کام سرانجام دیا۔

اخبار کے مطابق نگرانی کے اس آپریشن میں مکان کے اندر سے تصاویر حاصل کرنے اور آوازیں سننے کے لیے سیٹلائٹس کی مدد لی گئی۔

ذرائع کا کہنا ہے کہ یہ آپریشن سی آئی اے کی حالیہ تاریخ میں انسانی انٹیلیجنس کے حصول کا سب سے نازک مشن تھا جس میں پاکستانی مخبروں اور دیگر ذرائع کی مدد سے اس فصیل بند مکان کے رہائشیوں کی روزمرہ زندگی کا ایک نقشہ بنانے کی کوشش کی گئی۔

حکام کے مطابق نگرانی کا یہ سلسلہ گزشتہ برس اگست میں اس مشتبہ مکان کی سامنے آنے کے بعد شروع ہوا تھا اور یہ آپریشن اتنا بڑا اور مہنگا تھا کہ سی آئی اے نے گزشتہ برس دسمبر میں کانگریس سے ایجنسی کے کئی ملین ڈالر کے فنڈز اس آپریشن کے لیے مختص کرنے کی درخواست بھی کی تھی۔

واشنگٹن پوسٹ کے مطابق نگرانی کا یہ سلسلہ اسامہ کے خلاف فوجی آپریشن کے آغاز تک جاری رہا تاہم سی آئی اے کے جاسوسوں نے اس آپریشن میں کوئی کردار ادا نہیں کیا اور اسامہ کی ہلاکت کے بعد سی آئی اے کا نگرانی آپریشن بھی بند کر دیا گیا ہے۔

امریکی حکام کا کہنا ہے کہ سی آئی اے کا کام ’فائنڈ اینڈ فکس‘ تھا جس کا خفیہ آپریشنز کی زبان میں مطلب کسی اہم ہدف کی نشاندہی اور شناخت ہوتا ہے۔
بشکریہ بی بی سی اردو