اک خریداری سے پہلے اک خریداری کے بعد

سینٹ کی، کجلے کی اور غازے کی گلکاری کے بعد
وہ حسیں لگتی ہے لیکن کتنی تیاری کے بعد

باندھ کر سہرا نظر آئے ہیں یوں نوشہ میاں
جس طرح مجرم دکھائی دے گرفتاری کے بعد

ہیروئن پچپن برس کی ہوچکیں تو غم نہیں
اب گلو کاری کریں گی وہ اداکاری کے بعد

قوم کو بیدار کر ڈسکو میوزک چھیڑ کر
جو بچاری سو چکی ہے راگ درباری کے بعد

عید پر مسرور ہیں دونوں میاں بیوی بہت
اک خریداری سے پہلے اک خریداری کے بعد

عقدِ ثانی کا مزا پوچھا تو بولے شیخ جی
ایسے لگتا ہے، چکن چکھا ہے ترکاری کے بعد

راہِ الفت کی ٹریفک ہو کہ ”موٹروے” کی ہو
حادثے ہوتے ہیں شاہد تیز رفتاری کے بعد

شاعر: سرفراز شاہد