اُن کی مدح جو کررہا ہوں میں ۔۔ لمحہ لمحہ سنور رہا ہوں میں ۔ تازہ نعتیہ کلام

اللھم صل علی سیدنا ومولانا محمد وعلیٰ آلہ وصحبہ وبارک وسلم
ان کی مدح جو کر رہا ہوں میں
لمحہ لمحہ سنور رہا ہوں میں

رنگ اُن کا ہے میرے لفظوں میں
جن کے زیرِ اثر رہا ہوں میں

اُنکےدرکا بنا ہوں سگ جب سے
پھر کہاں در بدر رہا ہوں میں

چشمِ جاناں بنا گئی مجنون
کبھی اہلِ ہنر رہا ہوں میں

اُن کی رحمت ہے کہ تلاطم میں
ڈوب کر بھی اُبھر رہا ہوں میں

میں حسابِ حشر سے بچ نکلا
اُن کے پیشِ نظر رہا ہوں میں

وہ اُدھر ہی مدد کو آئے میری
مشکلوں میں جدھر رہا ہوں میں

اک سراپا جفا پہ اُن کی عطا
شرم سے تربتر رہا ہوں میں

دل میں نورِحبیب ہے جب سے
تب سے رشکِ قمر رہا ہوں میں

شوقِ محبوب میں بچھا پلکیں
عمر بھر منتظر رہا ہوں میں

میری ہستی سمیٹ جائیں کبھی
ریزہ ریزہ بکھر رہا ہوں میں

پا رہا ہوں نئی حیات رضا
اُن کے قدموں میں مررہا ہوں میں


کلام: محمد نعیم رضا۔ 2016۔02۔18

 

بہت شکریہ پاکستانی بھائی۔ عاجز بھائی کو دعاوں میں یاد رکھیے گا۔

 

شکریہ ملک بلال بھائی ۔ جزاک اللہ خیر۔ دعاؤں میں ہمیشہ یاد رکھنے کی التماس ہے۔