ان کا منگتا ہوں جو منگتا نہیں ہونے دیتے ۔۔ شاعر : تنویر اللہ شاکر

ان کا منگتا ہوں جو منگتا نہیں ہونے دیتے
یہ حوالے مجھے رسوا نہیں ہونے دیتے

میرے ہر عیب کی کرتے ہیں پردہ پوشی
میرے جرموں کا تماشہ نہیں ہونے دیتے

اپنے منگتوں کی وہ فہرست میں رکھتے ہیں سدا
مجھ کو محتاج کسی کا نہیں ہونے دیتے

بات کرتا ہوں تو آتی ہے مہک طیبہ کی
میرے لہجے کو وہ میلا نہیں ہونے دیتے

ہے یہ ایمان کہ آئیں گے لحد میں میری
اپنے منگتوں کو و ہ تنہا نہیں ہونے دیتے

آپ کی نعت سے جوبن ہے تخیل میں میرے
فکر تیرے مجھے بوڑھا نہیں ہونے دیتے

آپ کی یاد سے رہتی ہے نمی آنکھوں میں
میرے دریاؤں کو صحرا نہیں ہونے دیتے

حکم کرتے ہیں تو ملتے ہیں یہ مقطعے شاکرؔ
آپ نہ چاہیں تو مطلع نہیں ہونے دیتے
-----
شاعر : تنویر اللہ شاکر

---------------------
کیسے پیاسا میں کہوں اُن کو ذرا سوچو تو
وہ تو پیاسے کو بھی پیاسا نہیں ہونے دیتے
​

 

سبحان اللہ جزاک اللہ