اندھی آنکھوں والا راجہ گدھ مورے گھر آوے گا

اندھی آنکھوں والا راجہ گدھ مورے گھر آوے گا
زندہ لاشے بھوکے بچے دیکھ نہیں کچھ پاوے گا

کربل جیسی دھرتی موری دشت بنا ہے دیس مورا
پنگھٹ پر ہے شمر کا پہرہ پانی کون پلاوے گا

موم کی چھتری اوڑھے نکلے جگنو تپتے صحرا میں
دھوپ میں قتل ہوئے جو جگنو کون کسے دکھلاوے گا

آج مری مزدور کی چھوری داج ملا نہ دیگ پکی
راج محل کا راجہ پی کر رادھا خوب نچاوے گا

سرد رتوں کا چندا کاہے پریت کی جوت جگاوے ہے
سینے میں جو آگ بھری ھے دیکھے گا ڈر جاوے گا

لاکھوں رنگ سمیٹے دل میں کیا تصویر بناوے تو
مٹی کا باوا ہے مورکھ مٹی میں مل جاوے گا

دل کا دکھڑا لے بیٹھا درویش سجن کی محفل میں
جس نے من کی بات کہی یاں پگلے وہ پچھتاوے گا

فاروق درویش

 

جواب: اندھی آنکھوں والا راجہ گدھ مورے گھر آوے گا

بہت خوب درویش صاحب۔