امریکہ پاکستان چ کمائی دے موقعے پیدا کرن لئی ہتھ ونڈاون لئی پیڈے پیری: سفیر رچرڈ اولسن

اسلام آباد ___امریکی سفیر رچرڈ اولسن نے اج اسلام آباد میریٹ ہوٹل چ پاکستان سٹارٹ اپ کپ 2013 دےایوارڈاں دی ونڈ دی تقریب دے ویلے امریکی حکومت ولوں پاکستان چ کاروبار دے ودھاوے دےعزم دا یقین دوایا۔


اسٹارٹ اپ دا انتظام امریکی سفارتخانہ تے انڈس اینٹرپرینئورز اسلام آباد چیپٹر رل کے چلاندے نےتے، اے اک بزنس ماڈل مقابلہ سی جیڑا 19 ہفتے لئی جاری ریہا تے ایدے چ 400 نویں چالو کاروباراں حصہ لیا۔


پہلے، دوجے تے تیجے نمبر تے آون آلے کاروباراں نو دس لکھ، ساڈھے ست لکھ تے پنچ لکھ روپے دے نقدانعام دیتے گئے۔ پاکستان اسٹارٹ اپ کپ جیتن آلا جنوری 2014 نوں آرمینیا دے شہر ییریوان منعقد ہوون آلے پہلے سالانہ ورلڈ اسٹارٹ اپ کپ مقابلے چ شرکت کرے گا۔


سفیر رچرڈ اولسن نے اپنے خطاب چ آکھیا کے اسی سمجھدے آں کے مستقبل چ پاکستان دی خوشحالی دا پتا جدید تے چھیتی نال ترقی کردیاں ہویاں کمپنیاں توں لایا جاوے گا۔ اوناں نے آکھیا کے جدوں ایتھے پاکستان چ کاروباری لوکی کامیاب ہوندے نے تو او صرف پاکستانیاں لئی نہی پر امریکہ سمیت ساری دنیا دے لوکاں لئی معاش دے موقعے پیدا کردے نے۔


سفیر نے اے وی آکھیا کے امریکی سفارتخانہ اپنے پروگرام "خوشحالی دا سفر" دے ذریعے جدت پسند تے متحرک نوجوان پاکستانی کاروباری لوکاں دی حوصلہ افزائی لئی مالی ٹیک وی دے ریہا وے، جیڑے اپنے سپنے پورے کرن لئی مشکلاں نال لڑن تے اڑکاں پاسے لاون لئی تیار کھلوتے نے۔


سفیر رچرڈاولسن نے آکھیا کے اسٹارٹ اپ کپ پاکستان چ کاروباری تعلیم نوں وداھوا دیون آلے کئی منصوبیاں چوں اک منصوبہ وے۔ اوناں نے آکھیا کے اسی پاکستان دی ترقی چ دلچسپی رکھن آلے پاکستانی نژاد امریکی سرمایہ کاراں نال گل بات کرکے پتا لاون دی کوشش کررہے آں کے او کیس طرح پاکستانی کاروباری لوکاں دی آون آلی نسل دی مدد کر سکدے نے۔ اسی امریکی ادارہ برائے بین الاقوامی ترقی دے ذریعے پاکستان نجی سرمایہ کاری پروگرام لئی وی آسرا دے رہے آں۔ اے اک سرمایہ کاری فنڈ وے جیڑا چھیتی ہی چھوٹے تے درمیانے درجے دیاں پاکستانی کمپنیاں لئی برابری دی بنیاد تےسرمائے تائیں رسائی دی راہ کھول دوے گا ، جیدی لوڑ اوناں نوں اپنے کاروبار نوں ودھاون تے خوشحالی حاصل کرن لئی وے۔

ٹی آئی ای اسلام آباد دی صدر سارہ ہاشوانی نے آکھیا کے اس مقابلے دی کارن پاکستان اسٹارٹ اپ کپ دے 96 فیصد شریک اک دھندے دے قابل کاروباری ماڈل تخلیق کرن دے قابل ہو گئے نے۔