اشکوں کی زباں اور ہے لفظوں کی زباں اور ۔۔۔ایاز صدیقی

اشکوں کی زباں اور ہے لفظوں کی زباں اور
مدحت کے لئے چاہئے اندازِ بیاں اور

مدحت کا تقاضا ہے کہ اللہ سے مانگو
دل اور ، نظر اور ، دہن اور ، زباں اور

کیا مدح کرے آدمی ممدوحِ خدا کی
بندے کا بیاں اور ہے اللہ کا بیاں اور

بالا ہے بہت نرخِ غمِ عشقِ محمدﷺ
لعل و گہر اے دیدۂ خوننابہ فشاں اور

سانسوں میں نہیں آئی ابھی بوئے مدینہ
کچھ دور ابھی قافلۂ عمرِ رواں اور

کعبے میں جھکا سر تو مدینے میں جھکا دل
اللہ کا گھر اور محمدﷺ کا مکاں اور

ہوتا ہے ایاز آئینۂ ذہن ، مجلّا
مدحت سے نکھرتا ہے مِرا حسنِ بیاں اور
٭٭٭
ثنائے محمدﷺ ... ایاز صدیقی
​

 

سبحان اللہ ۔جزاک اللہ

 

اللہ تعالیٰ آپ کو بھی جزائے خیر عطا کرے آمین

 

اللہ تعالیٰ آپ کو بھی جزائے خیر عطا کرے آمین