اس کماندار کا یہ تیر نہیں ہو سکتا

اس کماندار کا یہ تیر نہیں ہو سکتا
ورنہ زخمی کوئی رہگیر نہیں ہو سکتا
سایہ داری کی روایت ہو اگر مدِّ نظر
پھر کسی پیڑ کا شہتیر نہیں ہو سکتا
دفن ہیں ہاتھ ہمارے اسی ملبے میں کہیں
یہ خرابہ کبھی تعمیر نہیں ہو سکتا
کیا ستم ہے کہ بچھڑ کر ترا پھر سے ملنا
وجۂ تبدیلیٔ تقدیر نہیں ہو سکتا
اتنی پیوست ہیں پیروں میں یہ کَڑیاں کہ فراغؔ
کوئی بھی شاملِ زنجیر نہیں ہو سکتا
اظہر فراغ​