استغفاریہ کافی ( حضرت خواجہ غلام فرید رحمتہ اللہ علیہ)

چوریوں جاریوں استغفار
بخشم شالا رب غفار

گندڑی عادت، گندڑے فعلوں
توبہ توبہ لکھ لکھ وار

کر کر سخت گناہ پرتاپیم
توں ہیں خاوند بخشن ہار

پیر پیغمبر تیڈے بانہیں
توں مالک ، توں کل مختار

میں بد عملی تے کر رحمت
جیں ڈینہہ یار وی یار نہ یار

اوگن ہاری ناں کہیں کم دی
کوجھی کملی بد کردار


تیڈا شان ہے فضل کرم دا
میں وچ ڈوہ تے عیب ہزار

آون یاد گناہ پرانے
پٹ پٹ روواں زار و زار


رات قبر دی ڈینہہ حشر دا
سر تے کڑکم باری بار

میں مسکین فرید ہاں تیڈا
توں بن کون اتارم یار