ارضِ ہستی کے کناروں کا ہِلایا جائے ۔

اَرضِ ہَستی کے کِناروں کو ہِلایا جائے
حَشر ایسا بھی کِسی روز اُٹھایا جائے

جادۂ منزلِ حَسرت کا ہُوں واقف مُجھ کو
وادئ یاس کے رَستے میں بَسایا جائے

کِس طَرح گَرمئ تُربت میں سَکوں پائیں گے
غَم کے ماروں کو کَہیں اور سُلایا جائے

ضَبط کو توڑ نہ پائیں کَبھی آنسُو اِن کو
دَرد کی آخری پَرتوں میں چُھپایا جائے

ایک عالم کی نِگاہیں یہ تَماشہ دیکھیں
یُوں سَرِ دار مُجھے کِھینچ کے لایا جائے

میرے اِحساس نے سُولی پہ چَڑھایا مُجھ کو
میرے اِحساس کو سُولی پہ چَڑھایا جائے

اِس طَرح جان لُٹائی ہے تُمہاری خاطر
جیسے لُوٹی ہوئی دولت کو لُٹایا جائے

اے حبیب آؤ زمانے کے اُجالے دیکھیں
کَب تَلک سوگ محبت کا مَنایا جائے

کلام ملک حبیب

 

بھت خوب

 

شکریہ آپ کا

 

میرے اِحساس نے سُولی پہ چَڑھایا مُجھ کو
میرے اِحساس کو سُولی پہ چَڑھایا جائے۔۔۔۔۔۔۔۔۔۔۔۔۔۔۔۔۔بھئی واہ !غزل کا ہر شعرشدت احساس سے لبریز ہے اوربالخصوص اِس شعر نے تو مجھے بہت متاثر کیا ہے۔ملک حبیب صاحب !آپ کے تخلیقی اُپج کی داد دیتاہوں ۔دورِحاضرمیں جبکہ اُردُو بعالمِ کس مپرسی ،سب سے زیادہ شاعروں سے دُکھی تھی ،آپ نے گویا
اِس کے زخموں پر مرہم رکھاہے ۔۔ آپ کے ہاں گہراادبی شعور ہر لفظ سے عیاں ہے۔آپ کا فکشن اور ڈکشن قابلِ ستائش ہے ،ماشاء اللہ !

 

واہ۔۔۔۔ زبردست بہت عمدہ
کمال کی شاعری کرتے ہیں آپ

 

شکیل احمد خان صاحب ، میتی وش اور ملک بلال ،،، شکر گزار ہوں آپ تمام دوستوں کی محبت کا۔۔۔