ابھی تو خواب ہی دیکھا ہے شہرِ طیبہ کا ۔۔۔۔ ایاز صدیقی

ابھی تو خواب ہی دیکھا ہے شہرِ طیبہ کا
ابھی سے حال دگرگوں ہے چشمِ بینا کا

مِری نظر میں ہے تنویرِ منزلِ مقصود
چراغِ راہِ یقیں ہے خیال آقا کا

رہِ حجاز کے ذروں میں جذب ہو جاؤں
علاج ہے یہ مِرے دردِ بے مداوا کا

نبیﷺ کے ہجر میں رونا بھی عینِ راحت ہے
" مِری نگاہ میں ہے جمع و خرچ دریا کا "

دعا قبول ہوئی آپ کے وسیلے سے
شعور آپ نے بخشا ہمیں تمنا کا

کہاں اسیرِ ہوا اور کہاں ثنائے رسولﷺ
حباب خاک احاطہ کرے گا دریا کا

خیالِ شافعِ محشر محیطِ جاں ہے ایاز
نہیں ہے تشنۂ تعبیر خواب فردا کا
٭٭٭
ثنائے محمدﷺ ... ایاز صدیقی
​

 

سبحان اللہ ۔جزاک اللہ

 

اللہ تعالیٰ آپ کو بھی جزائے خیر عطا کرے آمین

 

اللہ تعالیٰ آپ کو بھی جزائے خیر عطا کرے آمین