آرزو جینے کی دی تشنہ نبی نے مجھ کو ۔۔ شاکر کندن

آرزو جینے کی دی تشنہ نبی نے مجھ کو
حوصلہ بخشا سدا ذکرِ نبی نے مجھ کو
نام پلکوں پہ اتر آیا ہے موتی بن کر
حسن کیا خوب دیا جذبِ دلی نے مجھ کو
دیکھ کر حبِّ نبی کی میرے چہرے پر چمک
درِ فردوس پہ روکا نہ کسی نے مجھ کو
جب کبھی تازہ ہوا آتی ہے چونک اٹھتا ہوں
شاید آقا نے بلایا ہو مدینے مجھ کو
گھر کو چھوڑا تو بڑی نعمتیں پائیں میں نے
طیبہ دکھلا دیا اس در بدری نے مجھ کو
چوم کر گنبد خضرا کو جو روز آتی ہیں
انہی کرنوں نے سکھائے ہیں قرینے مجھ کو
جب بھی دربارِ رسالت میں طلب ہوتی ہے
لے کے جاتے ہیں خیالوں کے سفینے مجھ کو
جب لگی زیست میں ٹھوکر کبھی کوئی شاکرؔ
بڑھ کے پھر تھام لیا یاد نبی نے مجھ کو
------
شاکر کندن​

 

اللہ تعالیٰ آپ کو بھی جزائے خیر عطا کرے آمین