آب در آب اجالوں کا سمندر دیکھا ۔۔مقصود علی شاہ

آب در آب اجالوں کا سمندر دیکھا
بھیگی آنکھوں نے ترے شہر کا منظر دیکھا

حُجرۂ نُور سے اُبھرا وہ سحر کا سُورج
گنبدِ سبز میں چھُپتا ہُوا خاور دیکھا

آنکھ کو تاب نہ تھی، دل تھا سپردِ حیرت
دیکھنے کو تو ترا شہر برابر دیکھا

دیکھتے رہ گئے مجھ کو مرے احساس کے رنگ
نقشِ نعلین کا جب ماتھے پہ جھومر دیکھا

بہرِ تبریک ہی لکھتے رہے جو لکھتے رہے
نعت کے حرف سے منعوت کو اُوپر دیکھا

دھڑکنیں نامِ محمد کے جلو سے پھُوٹیں
اسم کا نقشِ مجسّم تھا جو دل پر دیکھا

حیرتیں لائی ہیں دامن میں درودوں کے گُلاب
مَیں نے شب شہر میں اِک خوابِ معنبر دیکھا

یہ عنایت تھی کہ ہم شہرِ مدینہ پہنچے
کون اسباب گِنے، کس نے مقدر دیکھا

سُرخرو ہو گئے مقصود سرِ حشر تمام
دفعتہً کھِلتا ہُوا جب رُخِ سرور دیکھا
-----
Maqsood Ali Shah
مقصود علی شاہ



​

 

آب در آب اجالوں کا سمندر دیکھا
بھیگی آنکھوں نے ترے شہر کا منظر دیکھا​

 

آنکھ کو تاب نہ تھی، دل تھا سپردِ حیرت
دیکھنے کو تو ترا شہر برابر دیکھا​

 

دھڑکنیں نامِ محمد کے جلو سے پھُوٹیں
اسم کا نقشِ مجسّم تھا جو دل پر دیکھا​

 

یہ عنایت تھی کہ ہم شہرِ مدینہ پہنچے
کون اسباب گِنے، کس نے مقدر دیکھا​

 

سُرخرو ہو گئے مقصود سرِ حشر تمام
دفعتہً کھِلتا ہُوا جب رُخِ سرور دیکھا​

 

سبحان اللہ - جزاک اللہ

 

اللہ تعالٰی آپ کو بھی جزائے خیر عطا کرے آمین