آئو آغوشِ گل میں سو جائیں

آئو آغوشِ گل میں سو جائیں
صبح تک نوبہار ہو جائیں
آئو بانہوں میں ڈال کر بانہیں
شوق کے راستوں میں کھو جائیں
خواب آور ہے بوئے زُلفِ دراز
اگر ارشاد ہو تو سو جائیں
یہ ارادہ ہے اے سمن اندام
حل تری دل کشی میں ہو جائیں
کیا کرے گی نسیمِ صبح بھی یاد
اس میں خوشبو تری سمو جائیں
ہائے وہ وقتِ خاص جب دو دل
بے ارادہ قریب ہو جائیں
آئو، دل نذرِ مہ وشاں کر کے
روح کو رنگ میں سمو جائیں
اے ستارو ہمیں خبر کرنا
جب غزالانِ شہر سو جائیں
آئو کافر جوانیوں کو ظفرؔ
سلکِ اشعار میں پرو جائیں
سراج الدین ظفرؔ
​