عاشقانہ خط کتابت از ظفر اقبال (حجام کا خط )

حجام کا خط
جانِ من! تم نے اپنے جانثار کو گویا بالکل ہی بُھلا رکھا ہے، پہلے کبھی کبھی ناخن ترشوانے آ جایا کرتی تھیں۔ اب وہ بھی سلسلہ موقوف ہے۔ ایسا لگتا ہے تم نے نیل کٹر خرید لیا ہے لیکن اس سے بھی ناخن پوری گولائی میں نہیں کٹ سکتے۔ تمہاری یاد آتی ہے تو گویا میرے دل پر اُسترے چل جاتے ہیں۔ بعض اوقات تو مجھ سے بات تک نہیں ہوتی، اور جو زبان قینچی کی طرح چلتی ہے وہ کام کرنا ہی چھوڑ دیتی ہے۔ ہمارے ہاں خضاب لگانے کی سہولت بھی موجود ہے، اپنے والد صاحب سے کہو کہ اس سلسلے میں ہماری خدمات حاصل کریں جو ہمارے لیے ایک سعادت سے کم نہیں ہوگا جبکہ پھٹکری لگانے کا بھی تسلی بخش انتظام ہے۔ جس اوباش نوجوان کی تم نے شکایت کی تھی کہ تمہیں چھیڑتا ہے، اگر میرے ہتھے چڑھ جائے تو اس کی حجامت بنا کر رکھ دوں۔(فقط تمہارا چاہنے والا: زُلف تراش خاں)​