شور رخصت ہو گیا اور گلی خاموش ہے

شور رخصت ہو گیا اور گلی خاموش ہے
گھورتی ہے موت ،حیراں زندگی خاموش ہے

جہل کی آواز اونچی ہو رہی ہے رات دن
ہے اسی میں عافیت سو آگہی خاموش ہے

ساز کی آواز دبتی جا رہی ہے بین سے
سر کا جادو اڑ گیا ہے راگنی خاموش ہے

یہ اچانک ضبط ایسا آگیا کیسے تجھے
شعلگی ہے آنکھ میں اور بے رخی خاموش ہے

بے بسی کی پرورش کی بے بسی ہے پاس بس
اور اتنی بے بسی پر بےبسی خاموش ہے

چاند کی چودہ کو رخصت ہو رہا ہے میرا چاند
شور ہے شہنائی کا اور چاندنی خاموش ہے

رات نے باندھی ہوئی ہے دل کی ساری کھڑکیاں
گھر کے دروازے سے لپٹتی روشنی خاموش ہے

 

زبردست کلام۔مبارکباد کے مستحق ہیں علی بھائی آپ، ماشاءاللہ