’’جب کہیں ذکر شہِ کون و مکاں ہوتا ہے‘‘ ۔۔ فراغؔ روہوی

’’جب کہیں ذکر شہِ کون و مکاں ہوتا ہے‘‘
کیف و مستی کا ہر اک سمت سماں ہوتا ہے

نام اُن کا جو کبھی وردِ زباں ہوتا ہے
اپنے دل پر بھی مدینے کا گماں ہوتا ہے

اُن کی عظمت کا احاطہ کوئی کس طرح کرے
اُن کا رُتبہ تو صحیفوں میں بیاں ہوتا ہے

کس قدر عشق محمدﷺ کا اثر ہے کہ مرا
دل مدینے میں مگر جسم یہاں ہوتا ہے

یاد آتے ہی نبیﷺ کی میں بدل جاتا ہوں
اور آزاد مرے دل کا جہاں ہوتا ہے

جس طرح عہد رسالت میں ہوا کرتا تھا
اب وہ انصاف زمانے میں کہاں ہوتا ہے

موت آئے تو رہِ شاہِ اُمم پر آئے
دل میں مومن کے یہ ارمان جواں ہوتا ہے

کر لیا میں نے مدینے کا نظارہ تو فراغؔ
کب مری آنکھ سے وہ شہر نہاں ہوتا ہے
٭٭٭
مرا آئینہ مدینہ ۔۔۔ فراغؔ روہوی​

 

اللہ تعالیٰ آپ کو بھی جزائے خیر عطا کرے آمین