یہ عمر غم میں نبی کے تمام ہو جائے۔۔علامہ سید ریاضؔ الدین سہروردی

صلی اللہ علیہ وآلہ وسلم​

یہ عمر غم میں نبی کے تمام ہو جائے
نصیب مجھ کو حیاتِ دوام ہو جائے

خدا کے جلوے نظر آئیں گے مجھے دل میں
اگر یہ عشقِ نبی کا مقام ہو جائے

ہمیشہ نعتِ نبی وردِ لب رہے میرے
مرا وظیفہ یہی صبح و شام ہو جائے

حجاب ان کے رخِ والضحٰی سے اُٹھ جائے
جو شوقِ دید نظر کا امام ہو جائے

حضور عرشِ بریں کی بلندیاں چھولوں
جو لمحہ بھر مرے دل میں قیام ہو جائے

سجاؤ محفلِ ذکرِ نبی خدا کے لئے
سکونِ دل کا ذرا اہتمام ہو جائے

الہٰی عمر ہوئی جا رہی ہے ختم مری
رخِ حبیب دکھا دے یہ کام ہو جائے

ریاضؔ شانِ شہی تجھ میں جلوہ گر ہو گی
اگر تو شاہِ عرب کا غلام ہو جائے
-------
علامہ سید ریاضؔ الدین سہروردی
کلیاتِ ریاضؔ سہروردی ( گلدستہ نعت 2 )
صفحہ نمبر۔723​

 

اللہ تعالیٰ آپ کوبھی جزائے خیر عطا کرے آمین