یکتا ہے زمانے میں بڑی شان خدیجہ ۔۔ منقبت ام المومنین سیدہ خدیجہ الکبری

یوم وصال ام المومنین سیدہ خدیجہ الکبری (۱۰ رمضان المبارک) کی مناسبت سے
ایک منقبت ہدیہ کرنے کی سعادت نصیب ہوئی۔ دعا ہے قبولِ بارگاہ ہو۔ آمین

اسلام پہ احسان ہے ایمانِ خدیجہ
یکتا ہے زمانے میں بڑی شانِ خدیجہ

دُختر ہے جو ملکہء خواتینِ بہشتاں
سردار جوانوں کے نواسانِ خدیجہ​

از غارِ حرا شانہ بہ شانہ ءِ رسالت
پیشِ شہِ اقدسؐ رہا دامانِ خدیجہ

جب شاہِ رُسل ؐ بیتِ خدیجہ کے مکیں ہیں
یوں بنتا ہےجبریلؑ بھی دربانِ خدیجہ​

ہیں لائقِ توصیف محمدؐ کی نظر میں
امت میں بھلا کس کو ہے عرفانِ خدیجہ

تقویتِ اسلام کو سب مال لُٹایا
ہےدینِ محمد ؐ پہ یہ احسانِ خدیجہ​

خیرات خدیجہ سے رضاؔ بھر لے تو دامن
تو بھی تو ہے ہمراہِ گدایانِ خدیجہ

ہدیہ عقیدت۔ محمد نعیم رضاؔ قادری