یوں عقیدت کو نمودار کیا جانے لگا

یوں عقیدت کو نمودار کیا جانے لگا
پائوں چھو کر اسے بیدار کیا جانے لگا
زخم دیوار کو دانستہ دیے جانے لگے
بند کمرے کو ہوادار کیا جانے لگا
عمر بھر چھو نہیں سکتے جو ترے کانوں کو
ایسے جھمکوں کو سزاوار کیا جانے لگا
جب سے لوٹے ہیں ترے در سے اداسی لے کر
ہم فقیروں سے بہت پیار کیا جانے لگا
ہو گیا آنکھ کا پانی بھی معاون اس میں
ہجر دھونے پہ جو اصرار کیا جانے لگا
کچھ دعا اور دوا ساتھ ملانے سے زمانؔ
بانجھ پیڑوں کو ثمر دار کیا جانے لگا
شعیب زمان
٭......٭......٭​