ہیں مِری روح، مِرا قلب، مِری جان عمرؓ ۔۔محمد ولی صادقؔ

ہیں مِری روح، مِرا قلب، مِری جان عمرؓ
اپنا سب کچھ کروں میں آپ پہ قربان عمرؓ

تقویت مل گئی اسلام کوایسی کہ نہ پوچھ
آپ لے آئے جو سرکار پہ ایمان عمرؓ

طاقتیں کفر کی سب لرزہ براندام ہوئیں
نکلے تلوار لئے ہاتھ میں جس آن عمرؓ

حق و باطل کو پرکھنے کا ہُنر جانتے ہیں
آپ فاروق ہیں اور آپ ہی فرقان عمرؓ

آپ کے سائے کا جس رہ سے گزر ہوتا تھا
چھوڑ دیتا تھا اُسی راہ کو شیطان، عمرؓ!

ہوں گنہگار و احقر مِری اوقات ہے کیا
میں بھلا کیسے بیاں کرلوں تِری شان عمرؓ

خود ہی پیدل تھےسواری پہ بٹھایا تھاغلام
عدل و انصاف کی اس طرح تھےمیزان عمرؓ

مثلِ تلوار بھی اور صورتِ گلزار بھی تھے
قہر اغیار پہ، اپنوں پہ مہربان عمرؓ

مجھکو اس درجہ عمر سے ہے محبت صادق
مِری چاہت، مِری حسرت، مِرا ارمان عمرؓ
----
محمد ولی صادقؔ​

 

سبحان اللہ جزاک اللہ