ہوائے لطف چلی ہے تو بے بہا چلی ہے ۔۔مقصود علی شاہ

ہوائے لطف چلی ہے تو بے بہا چلی ہے
کہ حرف حرف کو باندھے تری ثنا چلی ہے

چلیں گے اگلے برس، دیکھنا، نصیب وہاں
مدینہ دیکھنے اب کے برس صدا چلی ہے

بس ایک بار چلے تھے حُسین مقتل کو
پھر اِس کے بعد زمانے میں کربلا چلی ہے

درودِ پاک کا تھامے ہُوئے گُلِ ایجاب
دعائے سینۂ مضطر سوئے خُدا چلی ہے

بھٹک رہی تھی کہیں در بدر حیات مری
کرم ہُوا ہے تو اب شہرِ مقتضا چلی ہے

کفِ خیال پہ رکھ دے نئے حروف کی بھیک
مدینے والے تری سمت التجا چلی ہے

کہ جیسے سیکھنے آئی ہو حرفِ دلداری
صدا بہ لب تری گلیوں میں یوں سخا چلی ہے

عطا نے پہلے درِ خیر وا کیے ہُوئے ہیں
دُعا جو لے کے ترے در کا آسرا چلی ہے

نکل کے شہرِ بدن سے ہوائے جاں مقصود
مدینہ رُو ہُوئی ہے، سوئے مصطفیٰ چلی ہے
-----
Maqsood Ali Shah
مقصود علی شاہ



​

 

چلیں گے اگلے برس، دیکھنا، نصیب وہاں
مدینہ دیکھنے اب کے برس صدا چلی ہے​

 

بس ایک بار چلے تھے حُسین مقتل کو
پھر اِس کے بعد زمانے میں کربلا چلی ہے​

 

سبحان اللہ - جزاک اللہ

 

اللہ تعالٰی آپ کو بھی جزائے خیر عطا کرے آمین