ہم کو بزمی حُکم ہے لا تَر فَعُو اَصوَاتُکُم

ہم کو بزمی حُکم ہے لا تَر فَعُو اَ

جو حضُورِ پاک کے بابِ کرم پہ رو لئے
اُن گناہ گاروں نے اپنے داغِ عِصیاں دھو لئے
جو مدینے کی زمیں ہے،وہ فلک سے کم نہیں
اس زمیں کا ذرّہ ذرّہ موتیوں سے تولئے
پھر حضُورِ پاک کی مِدحت کے نغمے چھیڑیئے
آج پھر کانوں میں وہ فردوس کا رس گھولیئے
جو محمد مُصطفیٰ کے راستے سے ہٹ گئے
اُن سیہ بختوں نے اپنی راہ میں کانٹے بو لئے
جس درِ اقدس پہ کرتے ہیں ملائک بھی سلام
کتنے خوش قِسمت ہیں جو اس آستاں کے ہو لئے
اب مدینے جا کے دل کو جاگنے کا شوق ہے
آج تک ہم کس قدر غفلت کی نیندیں سو لئے
جب کسی کو آپ کے رُتبے کا اندازہ ہی نہیں
پھر بھلا اس باب میں اپنی زباں کیوں کھولئے
ہم کو بزمی حُکم ہے لا تَرفَعُو اَصوَاتُکُم
اس ادب گاہِ محبّت میں سنبھل کر بولئے
(خالد بزمی)

 

چہ خوب ساجد بھائی !

جو محمد مُصطفیٰ کے راستے سے ہٹ گئے
اُن سیہ بختوں نے اپنی راہ میں کانٹے بو لئے

ہم کو بزمی حُکم ہے لا تَرفَعُو اَصوَاتُکُم
اس ادب گاہِ محبّت میں سنبھل کر بولئے