ہر وقت کا ہنسنا تجھے برباد نہ کردے

اُجڑے ہُوے لوگوں سے گریزاں نہ ہُوا کر
حالات کی قبروں کے یہ کتبے بھی پڑھا کر

ہر وقت کا ہنسنا تجھے برباد نہ کردے
تنہائی کے لمحوں میں کبھی رو بھی لیا کر

اے دل تجھے دشمن کی بھی پہچان کہاں ہے
تو حلقہء یاراں میں بھی محتاط رہا کر

کیا جانئے کیوں تیز ہوا سوچ میں گم ہے
خوابیدہ پرندوں کو درختوں سے اڑا کر

اس شخص کے تم سے بھی مراسم ہیں تو ہونگے
وہ جھوٹ نہ بولے گا مرے سامنے آکر

پہلا سا کہاں اب مری رفتار کا عالم
اے گردش دوراں ذرا تھم تھم کے چلا کر

اک روح کی فریاد نے چونکا دیا مجھکو
تو اب تو مجھے جسم کے زنداں سے رہا کر

اب ٹھوکریں کھائے گا کہاں اے غم احباب
میں نے تو کہا تھا کہ مرے دل میں رہا کر

اس شب کے مقدر میں سحر ہی نہیں محسن
دیکھا ہے کئی بار چراغوں کو بُجھا کر

(محسن نقوی)

 

مہمان جی آپ کون ہیں اور ابھی تک مہمان خانے میں کیوں بیٹھے ہیں۔ رجسٹریشن کروا کے چوپال میں تشریف لائیے اور اتنی اعلی ذوق کی شاعری سے ہماری اردو کی رونقیں بڑھائیے ۔ شکریہ

 

کیا کریں جب داخلے کے دروازے بند ہوں تو مہمان خانے میں مہمان بن کر بیٹھنا پڑتا ہے ۔

 

سب مہمان کنواروں کی پارلیمنٹ میں آ کر پارلیمنٹ کے جاری سیشن کی کارروائی دیکھیں ۔