گلوں سے خون بہے باد ِ اشک بار چلے

گلوں سے خون بہے باد ِ اشک بار چلے
اٹھیں جنازے سیاست کا کاروبار چلے

فریبِ دہر ہے قاتل کی مرثیہ خوانی
بنے مزارِ صنم قصرِ اقتدار چلے

چڑھے جو درد کے دریا تو حسرتیں ڈوبیں
چلے جو تیر جگر چیر آر پار چلے

الٹ رہے ہیں نقاب ِ رخ ِ حیات وہی
شباب جن کا لہو دے کے ہم نکھار چلے

وضو کیا تھا شبِ وصل جن کے اشکوں سے
انہی کے دم سے مری رسم ِ سنگسار چلے

ہر انقلاب کا منشور قتل ِ مفلس ہے
اٹھائے کاسہ ء شاہانہ تاجدار چلے

کچھ اضطراب کی آتش میں جل گئے زندہ
کچھ انتظار ِ قیامت میں شب گذار چلے

چراغ جلتے ہیں درویش تیری تربت پر
بہا کے اشک کہاں یار سوگوار چلے

فاروق درویش
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔
بحر :۔ بحرِ مجتث مثمن مخبون محذوف مقطوع

ارکان بحر : مَفاعِلُن۔۔۔۔۔۔۔ فَعِلاتُن ۔۔۔۔۔۔۔مَفاعِلُن۔۔۔۔۔ ۔۔۔۔ فَعلُن
ھندسی اوزان ۔۔۔۔ 2121۔۔۔۔2211۔۔۔۔2121۔۔ ۔۔۔۔۔۔۔22۔
آخری رکن یعنی فعلن 22 کی جگہ فعلان 122 ، فَعِلُن 211 اور فعِلان 1211 بھی آ سکتے ہیں

تقطیع
۔۔۔۔۔۔۔۔۔۔۔۔۔۔۔۔۔۔

گلوں میں رن۔۔۔۔۔2121
گ بھ رے با۔۔۔۔۔۔۔ 2211
دے نو ب ہا ۔۔۔۔۔۔۔۔ 2121
ر چ لے ۔۔۔۔۔۔۔ 211


ا ٹھیں ج نا ۔۔۔۔۔۔۔ 2121
زے س یا ست ۔۔۔۔ 2211
کا کا رو با ۔۔۔۔۔۔2121
ر چ لے ۔۔۔۔۔211


یہ غزل جناب فیض احمد فیض کی اس غزل کی زمین میں کہی گئی ھے ۔۔۔۔۔۔۔ احباب ان دونوں غزلوں کی تقطیع فرما لیں تو اس بحر کو سمجھنے میں کوئی مشکل نہ ھو گی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔
غزل فیض
۔۔۔۔۔۔۔۔۔۔۔۔۔۔۔۔۔۔۔۔

گلوں میں رنگ بھرے ، بادِ نو بہار چلے
بھی آؤ کہ گلشن کا کاروبار چلے

قفس اداس ہے یارو ، صبا سے کچھ تو کہو
کہیں تو بہرِ خدا آج ذکرِ یار چلے

کبھی تو صبح ترے کنجِ لب سے ہو آغاز
کبھی تو شب سرِ کاکل سے مشکبار چلے

بڑا ہے درد کا رشتہ یہ دل غریب سہی
تمہارے نام پہ آئیں گےغمگسار چلے

جو ہم پہ گزری سو گزری مگر شبِ ہجراں
ہمارے اشک تری عاقبت سنوار چلے

مقام فیض کوئی راہ میں جچا ہی نہیں
جو کوئے یار سے نکلے تو سوئے دار چلے

فیض احمد فیض