گئے گزروں کو آخر بندگی کرنے کا ڈھب آیا ۔۔ (محمد شہزاد مجددی)

گئے گزروں کو آخر بندگی کرنے کا ڈھب آیا
’’گنہگاروں کے ہونٹوں پر درودِ پاک جب آیا‘‘

حصارِ نورِ اسم ذات جس دل کو ہوا حاصل
قریب اس دل کے کوئی خطرۂ ابلیس کب آیا

کوئی قرآن کی آیت ہو یا ارشادِ قدسی ہو
زبانِ مصطفیٰﷺ سے ہوکے ہی فرمانِ رب آیا

قیامت تک ہے دنیا میں یہی اللہ کی رسی
لئے قرآن جگ میں اک نرالی تاب و تب آیا

کہیں ’’والنجم‘‘ کی صورت کہیں ’’والطارق‘‘ کہہ کر
قسم فرمائی اس محبوب کی جو وقت شب آیا

نہ خالی لوٹ کر جائے درِ الطاف سے تیرے
ترا بندہ ترے در پر الہٰی جاں بلب آیا

سرِ بزمِ جناں حمدو ثنا کے لے کے نذرانے
کہا احباب نے وہ دیکھئے شہزادؔ اب آیا
-----
(محمد شہزاد مجددی)
​

 

اللہ تعالیٰ آپ کو بھی جزائے خیر عطا کرے آمین

 

سبحان اللہ ـ جزاک اللہ

 

اللہ تعالیٰ آپ کو بھی جزائے خیر عطا کرے آمین