کچھ بھی نہیں

ظلم ہم پر ہر آن ہوتے ہیں
رات دن امتحان ہوتے ہیں

آپ سے کیا کوئی توقّع ہو
آپ کب مہربان ہوتے ہیں

حُسن کی سادگی کا کیا کہنا
عشق پر سو گمان ہوتے ہیں

کوئی اِن کو مٹا نہیں سکتا
غم کے ایسے نشان ہوتے ہیں

دیکھنے میں ہیں عشق و حُسن جُدا
اصل میں ایک جان ہوتے ہیں

ظلم سہتے ہیں کچھ نہیں کہتے
اہلِ دل بے زبان ہوتے ہیں

آپ کو بے وفا کہا کس نے
آپ کیوں بدگمان ہوتے ہیں

بَرق تِنکے وہی جلاتی ہے
جو نشیمن کی جان ہوتے ہیں

اِتنا آساں نہیں ہے عشق، نصیر
اِس میں سو امتحان ہوتے ہیں


(سیّد نصیر الدین نصیر)​

 

خوب! فیصل بھائی!
----------------------------------------

اپنوں کے ستم اُن کی وفا یاد کریں گے
ہم جُرمِ محبت کی سزا یاد کریں گے

تُو آ گئی ، آنا تھا جنہیں وہ نہیں آئے
ہم بھی تجھے کیا کیا نہ صبا یاد کریں گے

تم ہم سے بچھڑتے ہو مگر بھول نہ جانا
یہ سُن کے رُکے اور کہا “یاد کریں گے“

اب حرفِ تسلّی کا تکلّف نہ کریں وہ
جو دل سے بھلا بیٹھے وہ کیا یاد کریں گے

ہم بھول کے اب نام بھی نہ لیں گے وفا کا
وہ چوٹ لگی ہے کہ سدا یاد کریں گے

ہم چشمِ تصّور میں سجا لیں گے وہ آنکھیں
یُوں پینے پلانے کا مزا یاد کریں گے

یاروں پہ نصیر آپ دل و جاں سے فِدا تھے
وہ پِھر گئے سب، آپ بھی کیا یاد کریں گے


(سیّد نصیر الدین نصیر)​

 

غیر کو دیکھ کے غیرت سے پِگھل جاؤں گا
صورتِ شمع تری بزم میں جل جاؤں گا

وہ بلاتے ہی رہیں میں تو مچل جاؤں گا
اُن کی محفل میں نہ آج اور نہ کل جاؤں گا

اِتنا بھولا نہیں ، باتوں سے بہل جاؤں گا
وہ سمجھتے ہیں کہ ٹالیں گے تو ٹَل جاؤں گا

آسرا مجھ سے یہ کہتا ہے کہ پھوٹے گی سحر
غم کا کہنا ہے اندھیرے میں نِگل جاؤں گا

آپ کیوں اتنے پریشاں ہیں صاحبِ ناصح
ٹھوکریں کھا کے زمانے کی سنبھل جاؤں گا

گلشنِ دہر کا اِک برگ خزاں دیدہ ہوں
خاک ہو جاؤں گا سڑ جاؤں گا گل جاؤں گا

آپ پِھرتے اگر قول سے بیشک پِھر جائیں
مَیں تو ایسا نہیں جو بات بدل جاؤں گا

ہے اِرادہ تو مِرا کوچہءِ جاناں کا نصیر
دل نہ مانا تو کہیں اور نِکل جاؤں گا


(سید نصیرالدین نصیر)​

 

پسندیدگی کا شکریہ برادر صاحب!
-------------------------------------------------------

اُن کی محفل میں تو ہو ہی جائے گا اک دن گُزر
وہ ہمیں دل میں جگہ دیں، یہ ہمارے دل میں ہے

دل باتیں پوچھنے کی ضد ہے آخر کس لئے
دل ہی دل میں‌خود سمجھ لو جو ہمارے دل میں ہے

اور باقی آرزوئیں میں گئیں سب خاک میں
اِک تمہاری آرزو ہے جو ابھی تک دل میں ہے

اُن کے جلووں سے مزیّن دونوں آنکھیں ہیں مری
اُن کا خاکہ، اُن کا نقشہ، اُن کی صورت دل میں ہے

اُن سے آنکھیں کیا ملیں، دونوں کی شامت آ گئی
ایک پیکاں ہے جگر میں، ایک پیکاں دل میں ہے

آپ سے کچھ کہہ کے ہم کس واسطے معتوب ہوں
آپ سب کچھ جانتے ہیں ، جو ہمارے دل میں ہے

یاس و حرماں، درد و غم، حَزن و الم، رنج و محن
اِک مکمل انجمن گویا ہمارے دل میں ہے

یادِ ساقی نے عطا کر دیں عجب کیفیّتیں
ایک میخانے کا میخانہ ہمارے دل میں ہے

اے نصیر اِس قافیے کی وسعتیں تو دیکھیئے
دونوں عالم کی سمائی ایک لفظِ “دل“ میں ہے


(سیّد نصیر الدین نصیر)​

 

خوب، افضال بھائی!

 

سینکڑوں بے قرار پھرتے ہیں
طالبِ وصلِ یار پھرتے ہیں

اُن کے مشتاق، اُن کے دیوانے
ہر طرف بے شمار پھرتے ہیں

دھوم بھی ہے دہائی بھی اُن کی
کر کے سولہ سنگار پھرتے ہیں

پھول کیا سَر اُٹھا کے بات کریں
باغ میں گُل عذار پھرتے ہیں

نام سُن کر مرا وہ کہنے لگے
ایسے ویسے ہزار پھرتے ہیں

مجھ کو ہو خاک اعتبار اُن پر
قول سے بار بار پھرتے ہیں

چاند سورج ہیں ان کے وارفتہ
رات دن، بے قرار پھرتے ہیں

اُن کے کوچے میں‌ایک آدھ نہیں
پاسباں تین چار پھرتے ہیں

جلوہءِ یار کی تمنا میں
لوگ دیوانہ وار پھرتے ہیں

اُن کی محفل سے لَوٹنے والے
لُوٹ کر ہر بہار پھرتے ہیں

اے نصیر اُن کی چاہ میں‌لاکھوں
کھو کہ صبر و قرار پھرتے ہیں


سید نصیر الدین نصیر

 

پسندیدگی اور توجہ دلانے کا شکریہ، ساگراج بھائی!

درستگی کر دی ہے۔

 

پسندیدگی کا شکریہ۔
------------------------------------


[center:3mpzfp01]آئے دن مل بچھڑتے ہو ادا اچھی
چاہنا ہی جو خطا ہے تو سزا اچھی

صبحِ غم اچھی نہ یہ شامِ بلا اچھی ہے
موت دونوں سے یقیناً بخدا اچھی ہے

سب دواؤں سے یہی ایک دوا اچھی ہے
اُن کے کوچے میں‌جو آ جائے، قضا اچھی ہے

تُو نہ ہو پاس تو دل اس سے بہل جائے گا
تُو بھی اچھا، تری تصویر بھی کیا اچھی ہے

جب کہا ہم نے کہ، ہم سے یہ تکلف کیسا
نیچی نظروں سے کہا اُس نے "حیا اچھی ہے"

بعد مدت کے ترے ہاتھ سے پینے کو ملی
اور اے ساقئِ میخانہ پلا! "اچھی ہے"

اُن کے دَر سے جو ملے بھیک وہ سب سے بہتر
اُن کے دَر پر جو صدا ہو، وہ صدا اچھی ہے

لے چلو آج مجھے کوچہءِ جاناں کی طرف
موسم اچھا ہے، رُت اچھی ہے، فضا اچھی ہے

میں یہ کہتا ہوں، مری آہِ رسا سے ڈریئے
وہ یہ کہتے ہیں، کہ یہ تیز ہوا اچھی ہے

اتنی گستاخ، کہ رہتی ہے ترے سَر پہ سوار
زلف کہتے ہیں جسے لوگ، بلا اچھی ہے

اچھے اچھوں کی ادائیں ہیں نگاہوں میں نصیر
اُن کا کیا کہنا، ادا جن کی سِوا اچھی ہے


(سید نصیر الدین نصیر)[/center:3mpzfp01]

 

بہت خوب۔۔ جبار جی۔۔ اچھی غزل ہے۔۔ :a180: