کب تلک تَپِش میں آپ جلنا ہے تجھے

کب تلک تَپِش میں آپ جلنا ہے تجھے
دوپہر کی دُھوپ تُو، آخر کو ڈھلنا ہے تجھے

سانس، چُھبتی کرچیوں کا بے نہایت راستہ
اور اس پر زندگی بھر تیز چلنا ہے تجھے

تجھ سے پیماں باندھتا تھا اور یہ سوچا نہ تھا
اپنی آنکھوں کی طرح ہر پل بدلنا ہے تجھے!!

رنگ مہندی کے ہوں یا تِتلی کے، اَوروں کے نصیب
ہاتھ کی پھیکی لکیروں سے بہلنا ہے تجھے

رات بھر کی بات ہے، خود کو تمازت سے بچا
دِن چڑھے پھر برف کی صورت پگھلنا ہے تجھے

خیروشر میں فیصلے کا وقت ہے، ترکش سنبھال
اپنے لشکر سے مثالِ حُر، نکلنا ہے تجھے

ریشمی رِشتوں سے *محسن* اِتنا بے پَروا نہ ہو،
لغزشوں کی بھیڑ میں آخر سنبھلنا ہے تجھے​