ڈرامہ اکبر ( آزاد )

صفحہ 29

امیروں وزیروں کی بیبیوں کو بلایا ہے۔ پرندہ پر نہ مارنے پائے۔ ایک شاہ آئے۔ ایک شہزادہ آئے۔
شہزادہ نشہ میں لڑکھڑاتا۔بھیڑ بھاڑ سے گھبراتا۔ ایک روش پر اکیلا جا نکلا۔ سامنے سے دیکھتا ہے کہ ایک نوجوان لڑکی گلاب کا پھول ہاتھ میں لئے چلی آتی ہے۔ وہ تو اکیلی ہے، مگر بادِ نسیم پنکھا جھلتی ہے۔ گلوں کی سرخی چہرے پر قربان ہوتی ہے۔ تبسم پیش لب رقص کرتا آتا ہے۔
جہانگیر۔ (دل میں کہتا ہے)
یہ پھولوں بھری ٹہنی ہے؟ کیسی لہکتی ہے۔ صبا نے بہار کی پشواز پہنی ہے۔ کیسی مہکتی آتی ہے۔ تارا ہے۔ کسی نے آسمان سے اتارا ہے یا پری ہوا سے اتر پڑی ہے۔ نہیں۔ نہیں۔ کوئی ارمان بھری ہے۔ ماں باپ کے نازوں کی بلی ہے۔ پر خدا جانے کس باغ کی کلی ہے۔
کورس۔ ایک تو جوانی دیوانی ۔ اس پر شراب ارغوانی۔ شہزادہ مست مخمور تھا۔ پر اسے دیکھ کر آنکھیں کھل گئیں۔

 

صفحہ 30

جہانگیر۔ (دل میں کہتا ہے) الامان۔ الامان۔ حسن۔ اللہ رے تیری شان
کچھ عجب رنگ عجب ڈھنگ ہے، سبحان اللہ
واہ کیا جلوۂ نیرنگ ہے، سبحان اللہ
کیا ترا طرۂ شب رنگ ہے، سبحان اللہ
کیا تیرا جہرۂ گل رنگ ہے، سبحان اللہ
کچھ بات کروں؟ خدا جانے بولے کہ نہ بولے۔ ایسا نہ ہو کہ کچھ کہہ بیٹھے۔
کورس کہتا ہے۔ ہاتھ میں دو کبوتر لئے تھا۔ لڑکی سے کہا۔
جہانگیر۔ بی لڑکی! ذرا ہمارے کبوتر لینا۔ ہم یہ پھول توڑ لیں۔
لڑکی۔ بہت خوب۔
گل چین۔ پل کے پل میں ایک گلدستہ تیار کر کے لایا۔
جہانگیر۔ بی لڑکی۔ لائیے میرے کبوتر۔
لڑکی۔ یہ حاضر ہے۔
جہانگیر۔ ہیں۔ ایک کیا ہوا؟

 

صفحہ 31

کورس۔ (لڑکی سہمی ہوئی صورت بنا کر بولی)
لڑکی۔ صاحب عالم۔ میں کیا کروں۔ وہ تو اڑ گیا۔
جہانگیر۔ ہیں۔ کیونکر اڑ گیا؟
لڑکی۔ صاحب عالم۔ یوں اڑ گیا۔ (پُھر سے دوسرا بھی اڑا دیا)
جہانگیر۔ (دل میں کہتا ہے) کبوتر گئے تو بلا سے۔ بات کرنے کو بہانہ تو ہاتھ آیا۔ کیا بات کروں؟ میں تو خود بھولا جاتا ہوں۔
جہانگیر۔ بی لڑکی۔ تمہارا نام کیا ہے؟
لڑکی۔ مہر النسا۔
جہانگیر۔ نہیں تم تو خورشید عالم ہو۔ وہ کون سی مشرق ہے جہاں سے یہ سورج کی کرن نکلی ۔
لڑکی۔ کیا فرمایا۔ صاحب عالم؟
جہانگیر۔ (دل میں کہتا ہے) ہائے ابھی لڑکی البیلی۔ لڑکیوں میں بھی نہیں کھیلی ہے۔

 

صفحہ 32

جہانگیر۔ تم کس کی بیٹی ہو۔
مہر النسا۔ ابوالحسن جو حضور کا ناظم بیوتات ہے۔ لونڈی اس کی بیٹی ہے۔
جہانگیر۔ نہیں۔ نہیں۔ تم جسے چاہو۔ لونڈی بنا لو۔ جسے چاہو غلام بنا لو۔
مہرالنسا۔ حضور کی باتیں میری سمجھ میں نہیں آتیں۔
جہانگیر۔ ہاں۔ ہاں میرے اوسان ٹھکانے نہیں۔ اس کے زہے طالع جو تمہارا غلام ہو۔
(مہرالنسا خیال کرتی ہے۔ دیکھو جنہیں خدا بڑھاتا ہے وہ اپنے تئیں ایسا گھٹاتے ہیں) انتہائے سادگی۔
(جہانگیر خیال کرتا ہے۔ خدا کرے ایک دم تو اور ابھی کوئی نہ آئے۔ اب کیا بات کہوں؟)
جہانگیر۔ مہرالنسا۔ تم کچھ بات نہیں کرتیں؟
مہرالنسا۔ لونڈی کی کیا مجال۔ حضور سے بات کر سکتے۔
جہانگیر۔ نہیں۔ میرے ایسے نصیب کہاں کہ تم بات کرو۔ اس

 

صفحہ 33

بھولے پن میں یہ میٹھی میٹھی باتیں کہاں سے سیکھ لیں؟
مہرالنسا۔ حضور جس طرح بزرگوں نے آقاؤں سے باتیں کرنا سکھائیں ہیں۔ اسی طرح عرض کرتی ہوں۔ اب حکم ہو کہ لونڈی رخصت ہو۔ اماں جان راہ دیکھتی ہوں گی۔
جہانگیر۔ اچھا۔ کس منہ سے تمہاری بات کو رد کروں۔ مگر کس دل سے کہوں کہ چلی جاؤ۔
کورس۔ یہ ادھر چلے، وہ ادھر چلیں۔ مگر شہزادہ دو قدم چلتا تھا اور پھر کر دیکھتا تھا۔ نور جہاں نے بھی مڑ کر دیکھا۔ جہانگیر ٹھیر گیا۔
جہانگیر۔ دیکھئے۔ خدا پھر کب ملاتا ہے۔ ہمیں بھول نہ جانا۔
مہرالنسا۔ واہ میری کئی سہیلیاں ہیں پر میں ایک کو نہیں بھولتی اور لوندی بھلا اپنے آقا کو بھول سکتی ہے۔ حضور کو بھولیں تو رہیں کہاں۔
جہانگیر۔ دل میں رہو۔ جان میں رہو۔ آنکھوں میں رہو۔ مگر مہرالنسا اب حضور حضور نہ رہے۔ اب حضور تم اور تابعدار ہم۔

 

صفحہ 34

مہرالنسا۔ صاحب عالم۔ حضور کیسی باتیں کرتے ہیں۔ خانہ زادوں سے اس طرح نہیں بولا کرتے۔
جہانگیر۔ میں تو نہیں کہتا۔ پر کیا کروں۔ اندر سے خودبخود آواز چلی آتی ہے۔ لو یہ گلدستہ میری نشانی لو۔ اور تمہیں خدا کے حوالے کرتا ہوں۔ ادھر دیکھنا۔ ہمیں بھولنا نہیں۔ لو تمہیں اللہ کی امان۔
مہرالنسا۔ حضور کا بھی اللہ بیلی۔ اللہ نگہبان۔
کورس۔ جس وقت رخصت کی نگاہیں ملیں۔ محبت کا اثر دل و جان میں برابر دوڑ گیا۔ لڑکی کے پیشِ نظر ایک خونی بجلی چمکی۔ کسی نے داہنے سے آواز دی۔ "خاوند کا خون ہو گیا۔" کوئی بائیں سے بولا۔ بلا سے بادشاہی تو پائی۔ پھر دیکھتی ہے۔ ایک تختِ شاہانہ پر جہانگیر بادشاہ بنا بیٹھا ہے۔ یہ بادشاہ کی بیگم بنی بیٹھی ہے۔ اور مہرِ سلطنت ہاتھ میں۔ عالم میں نور کی چاندنی ہے۔ لڑکی سہم گئی۔ حیران پریشان کچھ پشیمان کچھ شادمان۔

 

صفحہ 35

نور جہاں جب گھر میں گئی۔ تو شہزادے کی ملاقات کی ساری داستان ماں کو سنائی۔ وہ سنتے ہی سمجھ گئی۔ مگر دل میں کھٹک گئی۔ بادشاہ بیگم کے پاس کبھی کبھی ملنے کو جایا کرتی تھی۔ اور وہ بھی اس سے بہت محبت کرتی تھی۔ اسی وقت سوار ہو کر محل میں گئی۔ اور جو کچھ بیٹی سے سنا تھا۔ حرف بحرف سنایا۔ بیگم نے کہا کہ بی بی۔ تم گھبراؤ نہیں۔ میں اس کے ایسے کان مروڑوں گی کہ یاد کرے۔ بلکہ حضور سے کہہ کر اس کا پورا علاج کراؤں گی۔
۔۔۔۔۔۔۔
اکبرؔ۔ بیگمؔ۔ اقبالؔ
بیگم۔ حضور کے شیخو جی نے تو کام کیا!
اکبر۔ خیر باشد؟
بیگم۔ مرزا ابوالحسن بیوقات کی بی بی بڑی صاحب سلیقہ اور صاحبِ عصمت ہے۔ کبھی کبھی میرے پاس آتی ہے۔ اس کے ساتھ

 

صفحہ 36

اس کی لڑکی بھی آتی ہے۔ 12،13 برس کی ہو گی۔ حضور نے بھی اسے دیکھا ہو گا!
اکبر۔ ہاں۔ ہاں۔ شاید میں نے بھی اسے دیکھا ہے۔ سبز رنگ۔ بھولی بھولی باتیں کرتی تھی۔ چونچال لڑکی تھی۔ اب تو وہ بڑی ہو گئی ہو گی۔
بیگم۔ وہی۔ وہی! غرض کل جو مینا بازار لگا تھا تو اس میں وہ بھی آئی تھی۔ شیخو جی کی ااور اس کی ایک روش پر کہیں مٹھ بھیڑ ہو گئی۔ اور اس سے اس طرح کی باتیں کیں۔ جن سے معلوم ہوتا ہے کہ اس کی نگاہ اس کی طرف اچھی نہیں۔
اکبر۔ کبھی بچپن میں یہ اور وہ ساتھ کھیلے ہیں؟
بیگم۔ کبھی نہیں۔
اکبر۔ پہلے کبھی اس کی اس سے بات ہوتے سنی ہے۔
بیگم۔ نہیں۔
اکبر۔ اس کا نام کیا ہے؟

 

صفحہ 37

بیگم۔ مہرالنسا۔
اکبر۔ بلاؤ شیخو جی کو۔
اقبال خواجہ سرا شیخو جی کو لے کر حاضر ہوا۔
اکبر۔ شیخو جی! کل تم نے مینا بازار میں کسی کو گلدستہ دیا؟
جہانگیر۔ مہرالنسا کل روش پر چلی جاتی تھی اس نے مجھے نہایت ادب سے جھک کر سلام کیا۔ میرا جی خوش ہوا۔ ہاتھ میں گلدستہ تھا وہی دے دیا۔
اکبر۔ کچھ باتیں بھی ہوئی تھیں۔
جہانگیر۔ ہاں یہ بھی پوچھا تھا کہ تمہیں یہ باتیں کس نے سکھائیں۔ وہ بولی بزرگوں کی تربیت نے۔
اکبر۔ بس اور تو کچھ نہیں؟
جہانگیر۔ اور تو کچھ یاد نہیں۔
اکبر۔ اے شیخو جی (اور رو بہ فلک) دیکھیے خدا کو کیا منظور ہے۔
۔۔۔۔۔۔۔۔۔

 

صفحہ 38

تیسری جھلک
ایک طرف حسن ابدال کا گلزار ہے۔ قدرتی بہار ہے۔ پھول چہچہاتے ہیں۔ سبزے لہلہاتے ہیں۔ قدرتی نہریں۔ آبِ رواں کی لہریں۔ دوسری طرف اٹک کا کنارہ۔ پہاڑ کا اتارا۔ دریا کے زور۔ موجوں کے شور۔ بیچ میں دامنِ کوہ ہے۔ اکبری فوجوں کا انبوہ ہے۔ خدان شان و شکوہ ہے۔ جہانگیر شہزادہ سارے دن شکار کھیلا ہے۔ شام کو تھکا ماندا پھر کر آیا ہے۔
جہانگیر۔ آج تو بد چور چور ہو گیا۔
مصاحب۔ حضور! شہاب کو بلاؤں؟ چپی کرے۔
جہانگیر۔ بدن کی چپی سے کیا ہوتا ہے۔ دل تھک گیا ہے۔ جان تھک گئی ہے۔ ایسی تھکن میں نے آج تک نہیں دیکھی۔
مصاحب۔ کہہ تو نہیں سکتا۔ لیکن تھوڑا سا عرقِ انگور نوش فرمائیں

 

صفحہ 39

تو ساری کلفتیں ابھی دور ہو جائیں۔
جہانگیر۔ شراب؟ شراب؟ آج تک تو خدا نے محفوظ رکھا ہے۔
مصاحب۔ حضور چاہیں سو فرمائیں۔ مگر یہ تو وہ شے ہے کہ بہشت کی نعمتوں میں داخل ہے۔ کیا عرض کروں۔ بادشاہ پئے تو ہفت اقلیم زیرِ قدم ہو جائے۔ وزیر پئے تو جہان زیر قلم ہو جائے۔ بزدل کو دلیر۔ مرد کو جوانمرد بنائے۔ ہمت کو چڑھاتی ہے۔ حوصلہ کو بڑھاتی ہے۔ دل کو بہلاتی ہے۔ بڈھے کے لئے جوانی ہے۔ جوان کی زندگانی ہے۔ بہادر اسی سے تلوار لڑتا ہے۔ آدمی شیر کو شکار کرتا ہے۔ بے ہمت ملا نے مسجدوں میں کیوں پڑے ہیں؟ زاہدوں کے چہرے زرد کیوں پڑے ہیں؟
حضور! دوا کے لئے تو مضائقہ نہیں۔ آج کل حکیم ہمام نے ایک مرکب نسخہ جہاں پناہ کے لئے کھچوایا ہے۔ اکسیر کا حکم رکھتا ہے۔
جہانگیر۔ ہاں؟

 

صفحہ 40

مصاحب۔ حضور جہاں بانی نے منظور فرمایا تو پھر کیا مضائقہ۔
جہانگیر۔ اچھا سب کا فتوےٰ یہی ہے تو تم ہی جاؤ۔ جلد آؤ۔
مصاحب۔ حضور! عرق حاضر ہے۔
یہ حاضر ہے۔ سبحان اللہ۔ شیشہ کو تو ملاحظہ کیجیے۔ کیا زعفرانی رنگ ہے۔ گل پرشبنم ہے۔ ساقی کے ہاتھ پر جامِ جم ہے۔ دیکھنے ہی سے آنکھوں میں نور آتا ہے۔ پینے سے کیا دل کو سرور نہ ہو گا! حضور یہ وہ شے ہے کہ آگ کے لئے ہوا ہو جائے۔ قطرہ میں پڑے تو دریا ہو جائے۔ جان کو روشن کرے۔ دل کو چمن، چمن کو گلشن کرے۔ عقل کو پر لگائے۔ آنکھوں پر عینک چڑھائے۔ پرستان کی سیر دکھائے۔ پری کو شیشے میں اتار لائے۔
ایک جام پیا، اور مصاحب کی طرف دیکھا۔
لبوں پر تبسم، مصاحب نے ادب سے سلام کیا
جہانگیر۔ فی الحقیقۃ عجب عالمِ سرور ہے۔ آج تک یہ لطف حاصل نہ ہوا تھا۔ حرام کیونکر ہو گئی۔ گلاب، کیوڑہ، بید مشک سب ہی عرق ہیں۔ عرقِ انگور

 

صفحہ 41

نے کیا گناہ کیا کہ حرام ہو گیا۔
مصاحب۔ دم مارنے کا مقام نہیں۔ شاعرِ ہندی بھی یہی تعجب کرتا ہے کہ ؎
زاہد شراب پینے سے کافر ہوا میں کیوں
کیا ڈیڑھ چلو پانی سے ایمان بہہ گیا
مُلانوں کی باتیں ہیں۔ شاعرِ فارس کہتا ہے ؎
مے خور و مے خور کہ شوری رستگار
آتشِ دوزخ نکند بر توکار
گر نشود ایں سخنم باورت
دست بہ مے ترکن و بر شعلہ دار
جہانگیر۔ ارے ظالمو ڈرو خدا سے۔ اگر گناہ سے باز نہ رہو تو شرماؤ، نہ کہ اس پر ناز کرو اور اتراؤ۔
مصاحب۔ حضور! بندے روسیاہ کیا ناز کریں گے ۔ کریم الرحیم کی رحمت پر ناز ہے۔ ؎
پی لاکھ بار ساقی، کی لاکھ بار توبہ
اب چکا میں توبہ، توبہ ہزار توبہ

 

صفحہ 42

جہانگیر۔ چلو بس بہت کفر بک چکے۔ اب مجھے بھی نیند آ ئی ہے۔ تم بھی جا کر آرام کرو۔
مصاحب۔ ؎
ملک ہوویں یاور فلک یار ہووے
تو سویا کرے بخت بیدار ہووے
مٔے عقل و دانش سے جوں نورِ خورشید
ترا ساغرِ عقل سرشار ہووے
۔۔۔۔۔۔۔۔۔
چوتھی جھلک
پہلا سین
اکبر۔ ابوالفضل! دکن کا روزنامچہ دیکھ لیا؟
ابوالفضل۔ مہابلی۔ دیکھ لیا۔ اقبال شہنشاہی ہے۔ سب فضلِ الہی ہے۔
اکبر۔ شیخ جی کا بھی کوئی خط آیا۔
ابوالفضل۔ مہابلی۔ آج ہی آیا ہے۔

 

صفحہ 43

اکبر۔ شیخ جی کیا لکھتے ہیں۔ اور ہمارے شیخو جی کیا کرتے ہیں۔
ابوالفضل۔ شیخو جی شیخ جی کو خاطر میں نہیں لاتے۔ خلوت پسند کرتے ہیں۔ دربار کم کرتے ہیں۔ تمام اہلِ دربار اور دکن کے سردار آتے ہیں۔ بیٹھ بیٹھ کر چلے جاتے ہیں۔
راجہ مان سنگھ۔ غلام بھی سنتا تو ایسا ہی ہے۔ مگر خدا حضور کو سلامت رکھے۔ شہزادے کے بھی یہی عیش کے دن ہیں۔ جو باتیں ہیں متقضائے سن ہیں۔
اکبر۔ آخر ہم بھی تو کبھی اس سن میں تھے۔ جب ہمارے سامنے یہ بے باکیاں ہیں تو ہمارے بعد کیا کچھ کریں گے۔ سخت مشکل ہے۔
ابوالفضل۔ مہابلی۔ مشکل تو یہ ہے کہ شراب کی طرف بہت رغبت ہو گئی ہے اور خدا نہ کرے جو کچھ کہ اس کا انجام نظر آتا ہے۔
اکبر۔ ایسی باتوں میں مصاحبوں کی تدبیر کا بڑا اثر ہوتا ہے۔ ان کو لکھو۔
ابوالفضل۔ مہابلی! انہی خانہ خرابوں کی تو خرابیاں ہیں۔ نادان دوست ہیں

 

صفحہ 44

بے مغز پوست ہیں۔ وقت کے یار ہیں۔ انجام کے عیار ہیں۔ عارف روم انہی کے حق میں کہتا ہے ؎
اے برادر دور باش از یارِ بد
یارِبد بد تر بود از مارِ بد
مارِ بد تنہا تُرا بر جاں زند
یارِ بد بر دین و بر ایماں زند
اکبر۔ شیخو تو شراب نہ پیتا تھا۔ یہ بلا کہاں سے اس کے پیچھے لگ گئی؟
مان سنگھ۔ لوگ حکیم صاحب کی حکمت کہتے ہیں۔ یہ بھی حضور میں حاضر ہیں۔
حکیم ہمام۔ بلا گردان شاہ۔ ؎
مَے کہ بدنام کند اہلِ خرد را غلط است
بلکہ مَے میشود از صحبتِ ناداں بدنام
غلام تاوقتیکہ تجویز کردہ بود۔ اول گفتہ بود کہ شراب دواست۔ نہ کہ ہمیں آب و ہمیں غذا۔
مان سنگھ۔ حضور۔ اس کمبخت میں عیب یہی ہے کہ دوا ہو کر رہ

 

صفحہ 45

نہیں سکتی۔
اکبر۔ ابوالفضل اچھا شیخ جی کو ہماری طرف سے خط لکھو۔
اور شیخو جی کو تم خط لکھو کہ ان نادان دوستوں کو دفع کرو۔
اکبر۔ تم نے سنا۔ شیخو جی نے دکن کا بندوبست اچھا کیا۔
حکیم ہمام۔ سب حضور کا اقبال ہے۔ شہزادے کی طبیعت نے کمال صلاحیت کے ساتھ انقلاب کیا۔
اکبر۔ جی چاہتا ہے کہ اب تو شیخو جی کے سر پر سہرا بندھا دیکھیے۔
بیربیل۔ ابوالفضل! مناسب ایسا معلوم ہوتا ہے کہ کوئی مہارانی ہو جو بادشاہ بیگم بن کر حکمرانی کرنے۔
ابوالفضل۔ مہابلی۔ عین مناسب ہے۔ اور چند در چند مصلحتوں سے مناسب ہے۔
اکبر۔ دیوان جی۔ تمہیں یاد ہے جس دن جودھ پور کے حساب کا کاغذ

 

صفحہ 46

تم نے پیش کیا تو ہم نے تم سے کہا تھا کہ راجہ اودے سنگھ کے ہاں کا حال دریافت کرو۔ اور ہو سکے تو تصویر منگاؤ۔
ٹوڈرمل۔ مہابلی غلام نے اسی دن تعمیل کی تھی۔ تصویر حاضر ہے اور حال بھی دریافت کیا تھا۔ صورت۔ سیرت۔ شرم حیا کا طور طریقہ جو رانیوں اور شہزادیوں کو چاہیے۔ سب خوبیاں موجود ہیں۔
اکبر۔ بیربل! یہ تصویر تو دیکھو۔ اس لڑکی کا قیافہ کیا کہتا ہے؟
بیربل۔ حکیم جی تم دیکھو۔ مجھے تو ایسا معلوم ہوتا ہے کہ پیشانی میں جو اقبال ستارہ کی طرح چمکتا ہے۔ صاف کہتا ہے کہ تاج کو اس کے خاندان سے باہر نہ جانے دوں گا۔
حکیم ہمام
فی الحقیقت عجب نورِ اقبال ہے اور آنکھ میں حیا ہے کہ طبیعت کے تحمل مزاج کی بردباری سے خبر دیتی ہے۔ چہرے پر رعب دابِ شاہانہ ہے۔ آئندہ اقبالِ خداوندی سب پر غالب ہے۔
اکبر۔ ابوالفضل! کیا صلاح ہے؟ راجہ پہلو تو نہ بچائے گا؟

 

صفحہ 47

ابوالفضل۔ مہابلی کے اقبال نے دلوں میں دلداری کے نہال ایسے پرورش کئے ہیں کہ جو چاہیں وہی پھل لائیں۔ مگر شہزادے کی طبیعت کی طرف سے ذرا خیال ایسا نہ ہو کہ کریں کچھ اور۔ اور ہو جائے کچھ اور۔
ٹوڈرمل۔ حضور! عمر بھی ایک اثر رکھتی ہے۔ خدا حضور کا سایہ سر پر سلامت رکھے۔ آپ ہی سمجھ جائیں گے۔
اکبر۔ آخر ہم ہمیشہ بڈھے ہی تو نہ تھے۔ جب ہم نے گجرات کی بلغار میں 27 منزلوں کو 6 دن میں طے کیا تو ہماری کیا عمر تھی۔
خانخاناں۔ حضور کوئی 30،31 برس کی۔
اکبر۔ اللہ اکبر۔ خان خاناں۔ دیکھو! کل کا ذکر معلوم ہوتا ہے۔ یہ تو مجھے خوب یاد ہے کہ حملہ کے وقت نشان تمہارے ہاتھ میں دیا اور تمہیں تیرھواں برس تھا۔ جب ہیمو کا معرکہ مارا ہے تو ہم بھی 13 ہی برس کے تھے۔ مگر یقین جاننا کہ ایسی ایسی باتوں کا کبھی خیال تک بھی نہیں ایا۔
ٹوڈرمل۔ مہابلی! کہاں وہ اور کہاں آپ۔ ع

 

صفحہ 48

چہ نسبت خاک را با عالمِ پاک
اکبر۔ ابوالفضل! ہمارا جی چاہتا ہے کہ تمہارے ہاتھ میں صندل ہو۔ اور بیربل کے ہاتھ سے اس مبارکبادی کا ٹیکا لگے اورحق یہ ہے کہ تمہاری سربراہی کے بغیر یہ معاملہ روبراہ نہ ہو گا۔
ابوالفضل۔ جو مہابلی کا حکم ہو۔ غلاموں کی عین سعادت ہے۔
اکبر۔ بیربل! دیکھو تو لگن کیا ہے؟
بیربل۔ مہابلی! لگن تو وہ ہے کہ کبھی برسوں ہی کے بعد آتی ہو گی۔
اکبر۔ اچھا تو تم سدھ گنیش اور ابوالفضل بسم کریں۔ آج ہی پاتراب کرجاؤ اور راجہ سے جو گفتگو ہو ہمیں مفصل لکھو۔
۔۔۔۔۔۔۔۔۔
مہاراجہ۔ دیوان۔
اودے سنگھ۔ راج کاک۔
دیوان۔ راجہ بیربل اور ابوالفضل باغ میں داخل ہو گئے۔

 

صفحہ 49

مہاراجہ۔ دیوان جی جاؤ اور لے آؤ۔ پر کچھ مطلب بھی تو پاؤ۔
دیوان۔ بہت خوب۔
دیوان۔ مہاراج وہ حاضر ہیں۔
راجہ۔ اچھا (خلوت میں) کچھ نبض بھی دیکھی؟
دیوان۔ وہ تو کب کھلتے ہیں۔ پر دربار کے پرچہ نویس نے کچھ قربت کا شارہ کیا تھا۔ شاید وہی ہو۔
مہاراجہ۔ ہری ہری۔ اب تدبیر؟
دیوان۔ مہراج خود دانا ہیں۔
مہاراج۔ جہاں تک بنے ٹالو، نہیں تو (دل میں کہا) سنگ آمد و سخت آمد۔
دیوان۔ ہاں۔ آخر راجہ بھاڑا مل نے کیا کیا (خود اکبر کو بیٹی دے ہی دی)
راجہ۔ اچھا۔ اندر لاؤ۔
دیوان۔ بیربل اور ابوالفضل کو لے کر حاضر ہوا۔
بیر بل۔ اشیرباد۔

 

صفحہ 50

مہاراجہ۔ نمشکار۔
ابوالفضل۔ اقبال بامراد۔ عمردراز۔ دولت زیاد۔
مہاراجہ۔ براجئے۔ براجئے۔
راجہ بیربل۔ حضور کے مزاج؟
مہاراجہ۔ سب ایشور کا فضل ہے۔ تم صاحبوں کے مزاج۔
راجہ بیر بل اور ابوالفضل۔ سب مہاراج کی کرپا ہے۔
مہاراجہ۔ کہیے ہمارے مہابلی کا مزاج اچھا ہے؟
ابوالفضل۔ مہاراج! سب فضلِ خدا ہے۔ جہاں آپ جیسے نیک نیت باصفا رفیق۔ رنج و راحت کے شریک ہوں۔ وہاں خدا کا فضل ہی ہو گا۔
راجہ بیربل۔ مہابلی نے بھی بہت اشیرباد فرمائی ہے۔ اور لہکم کشل۔
ابوالفضل۔ مہابلی نے نہایت اشتیاق کے ساتھ مہاراج کا مزاج پوچھا ہے۔ اور ارکانِ دولت کے ساتھ راج پاٹ کی سلامتی کی دعا فرمائی ہے۔