چارہ گر ہے دل تو گھایل عشق کی تلوار کا

چارہ گر ہے دل تو گھایل عشق کی تلوار کا
کیا کروں میں لے کے پھاہا مرہمِ زنگار کا
روکشِ خلدِ بریں ہے دیکھ کوچہ یار کا
حیف بلبل اب اگر تو نام لے گل زار کا
حُسن کی بے پردگی پردہ ہے آنکھوں کے لیے
خود تجلی آپ ہی پردہ ہے روئے یار کا
حُسن تو بے پردہ ہے پردہ ہے آنکھوں کے لیے
دل کی آنکھوں سے نہیں ہے پردہ روئے یار کا
اک جھلک کا دیکھنا آنکھوں سے گو ممکن نہیں
پھر بھی عالم دل سے طالب ہے ترے دیدار کا
کوثر و تسنیم سے دل کی لگی بجھ جائے گی
میں تو پیاسا ہوں کسی کے شربتِ دیدار کا
نوری بریلوی
​